Бухоро вилоятида 2020 йил 27 апрель куни кузатилган кучли шамол ва ёғингарчилик 141,6 миллиард сўмлик зарар етказган. Шу муносабат билан Президент кўрсатмасига мувофиқ табиий офат оқибатларини бартараф этиш мақсадида банклар фоизсиз кредит ажратишни йўлга қўйган. Бироқ, ДХХ Бухоро вилояти бошқармаси ва Иқтисодий жиноятларга қарши курашиш департаменти ўрганишларига кўра, кредитлар мақсадли фойдаланилмаган.
Ўрганиш натижаларига кўра Жиноят кодексининг 167-моддаси 3-қисми «а» банди (ўзлаштириш ёки растрата йўли билан талон-торож қилиш) билан жиноят иши қўзғатилган. ДХХдан маълум қилишларича, жиноят иши доирасида терговга гумон қилинувчи тариқасида жалб қилинганлар орасида «Ўзсаноатқурилишбанк» ходимлари ҳам бор.
Таъкидланишича, «Ўзсаноатқурилишбанк» бош офиси ходими О.Т. ҳамда шу банкнинг «Тўқимачилик» филиали бошқарувчиси А.Қ. ўз номида бўлган иссиқхоналар бўйича, уларга зарар етмаган бўлса-да, «жиддий талофат кўрган» деган мазмунда қалбаки ҳужжатлар тайёрлаб, акциядорлар кенгашини огоҳлантирмай, жами 2 миллиард сўмлик фоизсиз кредит маблағларини ўз иссиқхоналари ҳисоб рақамига ўтказганликда гумон қилинмоқда.
Тергов ҳаракатлари давом этмоқда.
Изоҳ: Хабарнинг дастлабки варианти банкнинг ҳали суди бўлмаган икки ходими гўёки айбдорлиги рад этиб бўлмас даражада исботлангандек таассурот қолдирадиган мазмунда, айбсизлик презумпсияси тамойилига зид равишда тайёрлангани боис ушбу хабар 2021 йил 6 март куни таҳрирланди. «Дарё» таҳририяти манба берган бирламчи маълумотга таяниб тайёрланган мазкур хабар сабаб етказилган ноқулайликлар учун муштарийлардан узр сўрайди.
Изоҳ (0)