Yevropa parlamenti Lukashenkoni prezident deb tan olmadi va Rossiyaning Belarus ishlariga aralashuvini qoraladi

Yevropa parlamenti Belarusdagi vaziyat yuzasida rezolyutsiya qabul qildi. Meduza’ning xabar berishicha, hujjatga parlament a’zolarining 574 nafari rozilik bildirgan, 37 nafari qarshi chiqqan, 82 nafari javob berishga ikkilangan.

Rezolyutsiyada boshqa narsalar qatorida qayd etilishicha, Yevropa parlamenti:

• yakuniga ko‘ra davlat rahbari Aleksandr Lukashenko deb e’lon qilingan Belarusdagi 9-avgustda bo‘lib o‘tgan prezidentlik saylovlari natijalarini tan olmaydi;
• norozilik mitinglarining tinch namoyishchilarini zo‘ravonlik bilan tarqatish, korxonalardagi ish tashlovchilar va muxolifat faollarini ta’qib qilganlik uchun Belarus hukumatini qoralaydi;
• mamlakatda qiynoqlar va zo‘ravonlikni to‘xtatishni talab qiladi va tinch namoyishchilar o‘limi yuzasidan mustaqil tergov o‘tkazilishini talab qiladi;
• mamlakatda hokimiyat tinch yo‘l bilan berilishini qo‘llab-quvvatlaydi va Belarus muxolifatining muvofiqlashtiruvchi kengashini “demokratik o‘zgarishlar talab qilayotgan odamlarning vaqtinchalik vakili” sifatida tan oladi;
• saylovlarni soxtalashtirishga mas’ul shaxslarga, shu jumladan, Aleksandr Lukashenkoga nisbatan Yevropa Ittifoqining shaxsiy sanksiyalarini joriy etishni qo‘llab-quvvatlaydi;
• Rossiyaning Belarus ichki ishlariga gibrid aralashuvini qoralaydi;
• Lukashenko rejimini qo‘llab-quvvatlashda bevosita ishtirok etayotgan Rossiya fuqarolarini sanksiyalar ro‘yxatiga kiritish imkoniyatini o‘rganishga chaqiradi.

Eslatib o‘tamiz, 9-avgust kuni Belarusda prezidentlik saylovlari o‘tkazildi. Markaziy saylov komissiyasi ma’lumotlariga ko‘ra, Lukashenko 80 foiz ovoz olib oltinchi marta g‘olib bo‘ldi. Prezidentlikka nomzod Svetlana Tixonovskaya boshchiligidagi Birlashgan muxolifat ovoz berish natijalarini tan olmadi. Shu bilan birga, OAVlar va kuzatuvchilar saylovlarda ko‘plab qoidabuzarliklarga yo‘l qo‘yilganini bildirgan. Mamlakatda bir oydan ko‘proq vaqt davomida norozilik namoyishlari davom etmoqda.

19-avgust kuni Yevropa Ittifoqi davlatlari rahbarlari Belarusdagi saylov natijalarini tan olishdan bosh tortgan va mamlakat rahbariyatiga shaxsiy sanksiyalarni qo‘llashga va’da bergandi. 31-avgust kuni Latviya, Litva va Estoniya Aleksandr Lukashenko va yana 29 nafar belaruslik mansabdorga nisbatan sanksiya joriy qildi.

Germaniyaning Die Welt gazetasi esa Yevropa Ittifoqi Lukashenkoga qarshi sanksiyalar qo‘llashni rad etganini ma’lum qilgandi.