Европа парламенти Лукашенкони президент деб тан олмади ва Россиянинг Беларусь ишларига аралашувини қоралади

Европа парламенти Беларусдаги вазият юзасида резолюция қабул қилди. Meduza’нинг хабар беришича, ҳужжатга парламент аъзоларининг 574 нафари розилик билдирган, 37 нафари қарши чиққан, 82 нафари жавоб беришга иккиланган.

Резолюцияда бошқа нарсалар қаторида қайд этилишича, Европа парламенти:

• якунига кўра давлат раҳбари Александр Лукашенко деб эълон қилинган Беларусдаги 9 августда бўлиб ўтган президентлик сайловлари натижаларини тан олмайди;
• норозилик митингларининг тинч намойишчиларини зўравонлик билан тарқатиш, корхоналардаги иш ташловчилар ва мухолифат фаолларини таъқиб қилганлик учун Беларусь ҳукуматини қоралайди;
• мамлакатда қийноқлар ва зўравонликни тўхтатишни талаб қилади ва тинч намойишчилар ўлими юзасидан мустақил тергов ўтказилишини талаб қилади;
• мамлакатда ҳокимият тинч йўл билан берилишини қўллаб-қувватлайди ва Беларусь мухолифатининг мувофиқлаштирувчи кенгашини «демократик ўзгаришлар талаб қилаётган одамларнинг вақтинчалик вакили» сифатида тан олади;
• сайловларни сохталаштиришга масъул шахсларга, шу жумладан, Александр Лукашенкога нисбатан Европа Иттифоқининг шахсий санкцияларини жорий этишни қўллаб-қувватлайди;
• Россиянинг Беларусь ички ишларига гибрид аралашувини қоралайди;
• Лукашенко режимини қўллаб-қувватлашда бевосита иштирок этаётган Россия фуқароларини санкциялар рўйхатига киритиш имкониятини ўрганишга чақиради.

Эслатиб ўтамиз, 9 август куни Беларусда президентлик сайловлари ўтказилди. Марказий сайлов комиссияси маълумотларига кўра, Лукашенко 80 фоиз овоз олиб олтинчи марта ғолиб бўлди. Президентликка номзод Светлана Тихоновская бошчилигидаги Бирлашган мухолифат овоз бериш натижаларини тан олмади. Шу билан бирга, ОАВлар ва кузатувчилар сайловларда кўплаб қоидабузарликларга йўл қўйилганини билдирган. Мамлакатда бир ойдан кўпроқ вақт давомида норозилик намойишлари давом этмоқда.

19 август куни Европа Иттифоқи давлатлари раҳбарлари Беларусдаги сайлов натижаларини тан олишдан бош тортган ва мамлакат раҳбариятига шахсий санкцияларни қўллашга ваъда берганди. 31 август куни Латвия, Литва ва Эстония Александр Лукашенко ва яна 29 нафар беларуслик мансабдорга нисбатан санкция жорий қилди.

Германиянинг Die Welt газетаси эса Европа Иттифоқи Лукашенкога қарши санкциялар қўллашни рад этганини маълум қилганди.