O‘zbekiston Respublikasi Vazirlar Mahkamasining 2020-yil 12-avgustdagi 480-son “Olimpiya zaxiralari kollejlari faoliyatini tashkil etish chora-tadbirlari to‘g‘risida”gi qarorlariga muvofiq olimpiya zaxiralari kollejlari, olimpiya va milliy sport turlari bo‘yicha ixtisoslashtirilgan davlat maktab-internatlari hamda futbol mahorat maktablarida karantin talablaridan kelib chiqib, 2020/2021-o‘quv yilida koronavirus pandemiyasi sharoitida o‘quvchilar va xodimlar uchun qulay va xavfsiz bo‘lgan ta’lim jarayonlarini tashkil etish, shuningdek, o‘quvchilar hamda xodimlar salomatligini ta’minlash maqsadida Jismoniy tarbiya va sport vazirligi tizimidagi sport ta’lim muassasalarida 2020/2021-o‘quv yili joriy yilning 1-oktabridan boshlab amalga oshiriladi.
Sport ta’limi muassasalari ish faoliyatini yo‘lga qo‘yishga muassasa rahbari tomonidan o‘quvchilarni xavfsiz saqlash uchun tegishli shart-sharoitlarni ta’minlash to‘g‘risida imzolangan kafolat xati va Xalq deputatlari tuman (shahar) kengashlarining tegishli qarori mavjud bo‘lgan taqdirdagina ruxsat berilishi belgilandi.
Sport ta’lim muassasalari o‘z faoliyatlarini “O‘zbekiston Respublikasida COVID-19 pandemiyasi davrida umumiy o‘rta ta’lim maktablari va o‘rta maxsus maktab-internatlarining faoliyatini tashkillashtirish bo‘yicha vaqtinchalik sanitariya-epidemiologik talablar” (0375-20 SanQvaM) hamda “O‘zbekiston Respublikasida COVID-19 pandemiyasi davrida Jismoniy tarbiya va sport vazirligi tizimidagi ta’lim muassasalarida o‘quv jarayonini tashkil etish bo‘yicha vaqtinchalik talablar” asosida amalga oshiradi.
Sport ta’lim muassasalarida ta’lim jarayonlari o‘quvchilarning ota-onalari (ularning o‘rnini bosuvchi shaxslar)ning xohish-istaklaridan kelib chiqib, an’anaviy yoki onlayn (masofaviy) shaklda tashkil etiladi.
Sport ta’lim muassasalarida o‘qishni an’anaviy shaklda davom ettirish istagini bildirgan o‘quvchilarning ota-onalari (yoki ularning o‘rnini bosuvchi shaxslar)dan yozma rozilik talab etiladi, shuningdek, o‘quvchilarga, sog‘lig‘i to‘g‘risida ma’lumotnomani taqdim etishi hamda ularning ota-onalaridan yozma rozilik olingandan so‘ng, o‘qishga kelishlariga ruxsat beriladi.
Joriy yilning 20-sentabridan boshlab boshqa sport bazalarda (oromgoh, sanatoriya) tasdiqlangan sanitariya-gigiyena qoidalari va me’yorlariga qat’iy amal qilgan holda tegishli tashkilotlarning ruxsati bilan o‘quv-mashq yig‘inlarini tashkil etishga ruxsat etiladi.
Sport ta’lim muassasalari trener-o‘qituvchilari tomonidan o‘zlariga biriktirilgan o‘quvchilarga sport mashg‘ulotlari jadvalidan kelib chiqib, sport turlari bo‘yicha amaliy mashg‘ulot vazifalarini vazirlikning rasmiy veb-saytiga joylashtirilgan videoroliklar ko‘rinishida onlayn (masofaviy) shaklda berib borish va berilgan vazifalar hamda normativlarni o‘quvchilar tomonidan bajarilishini nazorat qilib borish yo‘lga qo‘yilmoqda.
Ishchi guruh sport ta’lim muassasalarining 2020/2021-o‘quv yili jarayoni va o‘quv-mashq yig‘inlarini tasdiqlangan sanitariya-gigiyena qoidalari va me’yorlariga qat’iy amal qilgan holda tashkil etilishini joyiga chiqqan holda o‘rganadi va doimiy ravishda nazorat qiladi.
Jismoniy tarbiya va sport vazirligi matbuot xizmati
Reklama huquqi asosida.
Izoh (0)