“Roma” sobiq hujumchisi Franchesko Totti rimliklar klubiga qaytishi mumkin.
Calciomercato nashrining xabar qilishicha, “Roma” biznesmen Den Fridkin qo‘liga o‘tgach, Tottining Rim klubiga qaytishi ehtimoli kuchaygan. Tomonlar oxirgi vaqtda faol muzokaralar olib bormoqda.
Franchesko tayinlanishi mumkin bo‘lgan ko‘plab lavozimlar bor, biroq asosiy variant sifatida texnik direktorlik lavozimi ko‘rilmoqda. Keyinchalik klub afsonasi vitse-prezidentlikkacha borishi mumkin. Totti texnik direktor maqomida sport departamentida muhim rolni o‘ynaydi.
Sentabr oyi oxiriga borib kelishuv imzolanishi mumkin. Oktabr oyida “Roma”ning hozirgi direktorlar kengashi o‘z ishini tugatadi.
Eslatib o‘tamiz, Totti futbolchilik faoliyatini yakunlagach “Roma”da direktorlik lavozimida ishlagan. Biroq rahbariyat bilan kelisha olmay klubni tark etgandi. Keyinchalik Franchesko rahbariyat o‘zgarmas ekan klubga qadam bosmasligini ma’lum qilgandi.Totti butun faoliyatini “Roma”da o‘tkazgan, sobiq futbolchi umrining 27 yilini shu klubga bag‘ishlagan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)