O‘zbekiston hamda MDH davlatlarida Telegram yoki WhatsApp messenjerlari orqali firibgarlar tomonidan internet foydalanuvchilari mablag‘larini o‘zlashtirish holatlari kuzatilgan, deya xabar bermoqda “O‘zkomnazorat”.
Firibgarlar Google, Apple, Facebook kabi mashhur kompaniyalarning logotiplaridan foydalangan holda turli guruhlarda yangi foydali aksiyalar haqida e’lon joylashtirmoqda va ushbu e’longa zararli havola yoki yuklab olish talab qilinadigan fayllarni qo‘shib qo‘ymoqda.
Qayd etilishicha, foydalanuvchi o‘zi bilmagan holda ushbu zararli faylni yuklab olishi oqibatida uning shaxsiy ma’lumotlari, bank kartasining raqami, hisob raqami, tug‘ilgan sanasi va parollari firibgarlar ixtiyoriga o‘tib qolishi mumkin.
Shuningdek, messenjerlardagi o‘zaro muloqotlarda notanish suhbatdosh ko‘pincha xabarni boshqa tanishlarga ham yuborishni, ilova yoki emojini yangilashni tavsiya qiladi.
Ekspertlarning qayd etishicha, xabarni boshqalarga ulashgan foydalanuvchi firibgarlikka bilib-bilmay sherik bo‘lib qoladi. Bundan tashqari, bu kabi xabarlarda “fishing” saytlari manzili ko‘rsatiladi va ularga kirib qolgan foydalanuvchi zararli virusni yuklab olishi va bu uning qurilmasidagi shaxsiy ma’lumotlarning, elektron hisobidagi mablag‘larining o‘g‘irlanishiga olib kelishi mumkin.
Bunday salbiy holatlarning oldini olish maqsadida messenjerlarda mediafayllarni avtomatik ravishda yuklab olish funksiyasini o‘chirib qo‘yish, begona akkauntlardan kelgan e’lonlarga, turli yolg‘on xabarlarga ishonmaslik tavsiya qilinadi.
O‘zbekistonda ham Telegram orqali real odam nomidan qalbaki akkaunt ochib, haqiqiy profil egasining tanishlaridan pul so‘rash, ulardan moddiy yordam olishga urinish holatlari kuzatilgan. “Tanishi”dan tong saharda yoki yarim tunda og‘ir ahvolda qolgani haqida xabar olgan foydalanuvchilarga begona odamning karta raqami yuboriladi. Muammo nimada ekanini tushunmagan foydalanuvchi do‘stiga yordam qilaman, deb firibgarlarga aldanib qolishi mumkin.
“O‘zkomnazorat” internet foydalanuvchilaridan ijtimoiy tarmoqlarda bu kabi holatlar kuzatilganida qaror chiqarishga shoshilmaslik, e’tiborli bo‘lish, messenjerlardagi akkauntlari orqali axborot almashinuvida xavfsizlik talablariga rioya qilishga chaqirgan.
Mavzuga doir:
- Ukrainada eng katta ma’lumotlar bazasini sotganlikda gumon qilinayotgan xaker qo‘lga tushdi
- Bill Geyts, Ilon Mask va Barak Obamaning Twitter akkauntlarini 17 yoshli o‘spirin buzgani ma’lum bo‘ldi
- Telegram Belarus bayrog‘i emojisini oq-qizil-oq rangli suratga almashtirib qo‘ydi. Mamlakat hukumatiga tegishli OAV ushbu harakatni fitna deb atadi
Izoh (0)