Qoraqalpog‘iston Jo‘qorg‘i Kengesida bo‘sh qolgan 5 ta deputatlik o‘rni uchun saylov bo‘lib o‘tadi

Qoraqalpog‘iston Respublikasi Jo‘qorg‘i Kengesida bo‘sh qolgan beshta deputatlik o‘rinlari uchun qayta saylov jarayonlari 20-sentabr kuni bo‘lib o‘tadi. Bu haqda Qoraqalpog‘iston Markaziy saylov komissiyasi mas’ul xodimiga tayanib, “Kun.uz” xabar berdi.

Unga ko‘ra, deputatlik saylovlari Qoraqalpog‘istonning beshta hududida qayta o‘tkazilishi rejalashtirilgan:

• Nukus shahri bo‘yicha — 4-sonli “Ye. Alako‘z” saylov okrugi;
• Ellikqal’a tumani bo‘yicha — 20-sonli “Sarabiy” saylov okrugi;
• Beruniy tumani bo‘yicha — 25-sonli “Navbahor” saylov okrugi;
• Qo‘ng‘irot tumani bo‘yicha — 49-sonli “Qo‘ng‘irot” saylov okrugi;
• Qorao‘zak tumani bo‘yicha — 63-sonli “Qorako‘l” saylov okrugi.

Qoraqalpog‘iston Respublikasining “Saylov to‘g‘risida”gi qonunining 68-moddasiga muvofiq, Qoraqalpog‘iston Markaziy saylov komissiyasi maxsus qaror qabul qilgan.

Ma’lumot uchun, Qoraqalpog‘iston Respublikasi Jo‘qorg‘i Kengesida 65 nafar deputat faoliyat olib boradi. Ayni paytda kengashda 5 ta deputatlik o‘rni bo‘sh qolmoqda.

Eslatib o‘tamiz, Qoraqalpog‘iston Jo‘qorg‘i Kengesi raisi Musa Yerniyazovda 24-iyun kuni koronavirus aniqlangan. U Respublika ixtisoslashtirilgan Xirurgiya ilmiy-amaliy tibbiyot markazining Nukus filialiga yotqizilgan. Unga COVID-19 infeksiyasi o‘ta og‘ir kechishi, ikki tomonlama pnevmoniya tashxisi qo‘yilgan. Qoraqalpog‘iston SSV axborotiga ko‘ra, Musa Yerniyazov bir oy og‘ir ahvolda bo‘lgan. 31-iyul kuni esa Musa Yerniyazov vafot etdi.