O‘zbekistonda tibbiy oliy ta’lim muassasalarini tugatgan shaxslarga dorixona ochishlariga ruxsat berildi. Bu haqda 25-avgust, seshanba kuni AOKAda bo‘lib o‘tgan matbuot anjumanida Adliya vazirligi boshqarma boshlig‘i o‘rinbosari Javohir Qullizoda ma’lum qildi.
Anjumanda Prezident Shavkat Mirziyoyevning “Litsenziyalash va ruxsat berish tartib-taomillarini tubdan takomillashtirish chora-tadbirlari to‘g‘risida”gi farmoni mazmun-mohiyati va ijrosi yuzasidan tushuntirish berildi.
Javohir Qullizodaning aytishicha, bugungi kunda faqat oliy farmatsevt ma’lumotiga ega bo‘lgan mutaxassislargagina dorixona mudiri sifatida ishlashiga ruxsat etilgan edi.
“Endilikda qonunchilikka o‘zgartirish kiritish bo‘yicha topshiriqlar berildi. Oliy tibbiy ma’lumotga ega bo‘lgan mutaxassislar ham dorixona mudiri sifatida ishlashlari mumkin. Bu tibbiy oliy ta’lim muassasalarini tugatgan shaxslar dorixona ochishlari mumkin degani”, — dedi mutaxassis.
Farmonga muvofiq, 2021-yil 1-yanvardan boshlab:
- 37 ta litsenziya va 10 ta ruxsatnoma bekor qilinadi;
- 16 ta litsenziya va 11 ta ruxsatnoma birlashtirish yo‘li bilan bekor qilinadi;
- 17 ta litsenziya va 14 ta ruxsatnoma xabardor qilish tartibi joriy etilishi yo‘li bilan bekor qilinadi;
- 14 ta turdagi litsenziya va ruxsatnomani rasmiylashtirish muddatlari qariyb 2 baravarga qisqartiriladi;
- 115 ta litsenziya va ruxsat berish xususiyatiga ega hujjatni olish tartib-taomillari yanada soddalashtiriladi.
Izoh (0)