Qozog‘istonda 17-avgustdan boshlab karantin cheklovlari yumshatiladi

Koronavirusga qarshi kurash bo‘yicha davlat komissiyasi 17-avgustdan boshlab Qozog‘istonda karantin cheklovlarini bosqichma-bosqich olib tashlash rejasini tasdiqladi. Bu haqda mamlakat bosh vaziri matbuot xizmatiga tayanib, Tengrinews xabar berdi.

Xabar qilinishicha, Qozog‘istonda karantin choralari amalda bo‘lgan davrda epidemiologik vaziyatni barqarorlashtirish va tibbiyot tizimi yuklamasini sezilarli darajada kamaytirishga erishilgan. Kunlik kasallanishlar sonining o‘sishini 4 foizdan 0,5 foizgacha qisqartirishga muvaffaq bo‘lingan. Sog‘ayish ko‘rsatkichi 76 foizga yetdi. Mavjud koyka-o‘rinlar bandligi 26 foizni tashkil qilmoqda.

Davlat komissiyasi viloyat hokimlarining takliflarini, shuningdek, Sog‘liqni saqlash vazirligi va boshqa idoralarning nuqtayi nazarini ko‘rib chiqib, karantin cheklovlarini bosqichma-bosqich olib tashlash rejasini tasdiqladi.

Qozog‘istonning barcha hududlarida 17-avgustdan boshlab quyidagi faoliyat turlari qayta tiklanadi:

• savdo-ko‘ngilochar markazlar, savdo uylari (butiklar), chakana savdo tarmoqlari, yopiq bozorlar (qabul qilish imkoniyatining 30 foizidan oshmagan holda);
• go‘zallik salonlari, sartaroshxonalar, spa-markazlar, kosmetologiya xizmatlari ko‘rsatadigan obyektlar (har bir tashrif buyuruvchiga 4 kvadrat metr maydon to‘g‘ri kelishi va vaqtni oldindan kelishgan holda);
• suv havzasi bo‘lmagan fitness markazlari, saunalar (qabul qilish imkoniyatining 50 foizi darajasida);
• bolalarning korreksiya xonalari, bolalar va kattalar uchun o‘quv markazlari (vaqtini oldindan kelishgan holda 5 kishilik guruhlarda); maktabgacha ta’lim muassasalarining navbatchilik guruhlari (15 kishidan ko‘p bo‘lmagan guruhlarda);
• ochiq havodagi attraksionlar (masofa saqlash, niqob taqish, oqimni boshqarish).

Ish beruvchilar xodimlarning kamida 80 foizi uchun masofaviy ish shaklini saqlashi tavsiya etiladi.

17-avgustdan boshlab ochiq havoda individual va guruhli mashg‘ulotlarga (5 kishidan ko‘p bo‘lmagan) va terma jamoalar, klub jamoalari (30 kishidan ko‘p bo‘lmagan) uchun sport mashg‘ulotlariga ruxsat beriladi.

Shuningdek, 17-avgustdan boshlab jamoat transportida harakatlanishga ham ruxsat beriladi. Bunda oxirgi bekatlarda shamollatish va dezinfeksiya ishlari olib boriladi.

Shu bilan birga, quyidagi faoliyat turlari uchun taqiqlar saqlanib qoladi:

• ko‘ngilochar, sport, oilaviy, xotira, tantanali va boshqa ommaviy tadbirlarni uyda o‘tkazish;
• barlar, tungi va o‘yin klublari, karaoke, oziq-ovqat kortlari, kinoteatrlar hamda bolalar va kattalar uchun boshqa ko‘ngilochar muassasalarning faoliyati: madaniy obyektlar, muzeylar, konferensiyalar, ko‘rgazmalar, forumlar faoliyati;
• suzish havzalari, shahar va jamoat plyajlari, ochiq suv parklari ishi;
• diniy tashkilotlar ishi;
• shahar atrofidagi yo‘lovchi poyezdlari/elektropoyezdlar harakati, umumiy vagonlarni shakllantirish. Ish poyezdlari, shaharlararo avtobuslar/mikroavtobuslar bundan mustasno.

Epidemiologik vaziyatni yanada barqarorlashtirish uchun dam olish kunlari cheklov choralari ko‘riladi.

Bosh vazir Asqar Maminning ma’lum qilishicha, niqob taqish rejimi va ijtimoiy masofani saqlash har bir kishi uchun majburiy sanitariya talablari bo‘lib, fuqarolar hayotidagi odatiy holga aylanishi lozim. Tadbirkorlik subyektlari o‘z faoliyatini ular to‘liq tayyor bo‘lgandan keyingina qayta boshlashi kerak.