Professional boksning og‘ir vazn toifasi vakili britaniyalik bokschi Dillian Uayt (26-1, 18 KO) mazkur divizionda WBA, WBO, IBF va IBO kamarlari sohibi Entoni Joshuaga (23-1, 21 KO) haqidagi fikrlari bilan bo‘lishdi.
“Agar u Povetkinga qarshi jangimdan keyin ringga chiqadigan bo‘lsa, u holda jang qilishimizga to‘g‘ri keladi. Entoni buni o‘yin deb o‘ylamoqda, ammo men o‘ynamayapman. Barcha bir-birimizning yuzimizga qarab baqirish bilan o‘tib ketadi deb o‘ylayapti, biroq Joshua bu ishni qilsa, jang bo‘ladi.
Povetkinga qarshi jangimda Joshuaning kimga muxlislik qilishi men uchun qiziq emas. U bugun bir gap aytadi, ertasiga esa boshqasini. Unda mantiq degan narsa yo‘q.
U shunchaki bo‘lmag‘ur narsalar haqida ko‘p gapiradi. Har doim valdirayveradigan odamlardan charchadim”, — deydi Uayt.
Ma’lumot uchun, Dillian Uayt faoliyatidagi yagona mag‘lubiyatni 2015-yilning dekabrida Entoni Joshuaga qarshi bo‘lib o‘tgan jangda qabul qilib olgan.
Eslatib o‘tamiz, Dillian Uayt rossiyalik bokschini mag‘lub etadigan bo‘lsa, u holda Tayson Fyuri va Deontey Uaylder o‘rtasidagi jang g‘olibi bilan ringga ko‘tariladi.
Izoh (0)