Respublika maxsus komissiyasining qarori bilan 4—5-avgust kunlari Toshkent—Buzuluk—Toshkent va Toshkent—Kinel—Toshkent yo‘nalishlarida Rossiyaning Orenburg va Samara viloyatlariga O‘zbekiston fuqarolarini vatanga qaytarish uchun ikkita poyezd yuborildi.
O‘zbekiston Tashqi ishlar vazirligi matbuot xizmatidan ma’lum qilishlaricha, O‘zbekistonning Qozon shahridagi Bosh konsuli tashkiliy va boshqa masalalarni hal qilish uchun o‘zbekistonliklar to‘plangan joyda bo‘lib turibdi.
6-avgust kuni Orenburg viloyatining “Buzuluk” stansiyasidan 920 nafar vatandosh bilan birinchi poyezd O‘zbekistonga jo‘nab ketdi. Ikkinchi poyezd 7-avgust kuni Samara viloyatining “Kinel” stansiyasidan 930 nafar o‘zbekistonlik bilan jo‘naydi. “Rossiya—Qozog‘iston chegarasida to‘plangan jami 1850 nafar O‘zbekiston fuqarolari yurtimizga qaytariladi”, — deyiladi TIV axborotida.
Qayd etishlaricha, 7-avgust holatiga ko‘ra Orenburg va Samara viloyatlarida Rossiya—Qozog‘iston davlatlararo chegarasi yaqinida O‘zbekiston fuqarolarining to‘planishi kuzatilmayapti. “Vatanimizga qaytib kelganidan so‘ng O‘zbekiston fuqarolari Respublika maxsus komissiyasi tomonidan belgilangan talablarga qat’iy rioya qilgan holda karantinda bo‘lishlari shartligini eslatib o‘tamiz”, — deyiladi xabarda.Ayni vaqtda, TIV koronavirus infeksiyasi tarqalayotgan bir paytda “ko‘p sonli fuqarolarimizning bir joyda to‘planishi ularning COVID-19 bilan kasallanish ehtimolini keskin oshirishi” mumkinligidan ogohlantirgan. “Vatandoshlarimizdan Rossiya—Qozog‘iston davlatlararo chegarasini kesib o‘tish nuqtalariga bormasliklarini, hozirda bo‘lib turgan joylarida qolishlarini va barcha karantin talablariga qat’iy rioya qilishlarini yana bir bor so‘raymiz”, — deb murojaat qilgan TIV.
Izoh (0)