Andijon viloyati hokimi Shuhrat Abdurahmonov aholiga qilgan navbatdagi murojaatida bugungi sharoitdan kelib chiqib, karantin qoidalari asosida yashashni o‘rganish kerakligi hamda iqtisodiyotni ham rivojlantirish zarurligini aytib o‘tgan. Bu haqda “Daryo” muxbiri Umidjon Mamarasulov xabar berdi.
Viloyat hokimi o‘z murojaatida holatni barqarorlashtirish maqsadida 2020-yilning 10-iyulidan boshlab karantin qoidalari qayta tiklanganini, uy sharoitida davolanayotgan bemorlar hamda karantinga olingan shaxslarga tibbiy maslahat berish maqsadida 11-05 qisqa raqamli Call-markaz faoliyati yo‘lga qo‘yilganini ta’kidlagan.
Hokimning qayd etishicha, viloyatda mavsum boshidan buyon 102461 nafar fuqaro karantinga olingan. Ularning 7645 nafari chetdan kelgan fuqarolar hisoblanadi. Shu kunga qadar 93946 nafari karantindan chiqarilgan.
Ta’kidlanishicha, hozirda 8515 nafar fuqaro karantin va tibbiy kuzatuvda saqlanmoqda. Karantin davrida virusga chalinishda gumon qilingan fuqarolardan 112 mingdan ortiq namunalar olinib, tekshiruvdan o‘tkazilgan. 2020-yil 5-avgust holatiga ko‘ra viloyatda virusga chalingan fuqarolar soni 1058 nafarni tashkil etmoqda. Ularning 377 nafari chetdan kelgan, karantin muassasasidagi fuqarolar hisoblanadi. Bugungi kunga qadar 978 nafar, ya’ni, 92 foiz bemorlar virusdan butkul sog‘aygan.
Hozirda viloyatda koronavirusga chalingan 78 nafar bemor davolanmoqda. Bemorlarning ikki nafari “Do‘stlik” chegara posti orqali Qirg‘izistondan o‘tgan, karantin muassasasida bo‘lgan fuqarolar bo‘lsa, 76 nafari uy karantinidagi fuqarolardir. Davolanayotgan bemorlarning to‘rt nafari og‘ir, 74 nafarining ahvoli esa qoniqarli va yaxshi holatda.
“Bu yil og‘ir sinovlarga boy bo‘ldi. To‘rt yarim oydan buyon mamlakatimizda karantin hukm surmoqda. Shu muddat davomida biz kuchaytirilgan karantin cheklovlarini ham, karantin cheklovlari yumshatilgan holatlarni ham boshimizdan o‘tkazdik. Bu kasallik qachongacha davom etadi, bilmaymiz. Shu sababli bugungi sharoitdan kelib chiqib, karantin qoidalari asosida yashashni o‘rganishimiz kerakligi hamda iqtisodiyotni ham rivojlantirish zarurligini ta’kidlamoqchiman. Barcha fuqarolarimizni karantin talablariga qat’iy rioya qilishga chaqiraman. Har kim o‘z sog‘ligiga befarq bo‘lmasligi lozim”, — degan Shuhrat Abdurahmonov.
Izoh (0)