Тошкентда эски Isuzu’ларни газда ҳаракатланадиган Хитой автобусларига алмаштириш бошланди

«Автосантранс-сервис» МЧЖ томонидан Хитойдан харид қилинган автобуслар Тошкентда эски Isuzu’лар ўрнини эгаллайди. Бу ҳақда «Тошшаҳартрансхизмат» АЖ хабар берди.

Ҳозирда «Тошшаҳартрансхизмат» АЖ тизимида 10 га яқин хусусий корхоналар йўловчи ташиш билан шуғулланади. Таъкидланишича, улар томонидан йўналишларга қўйилган автобусларнинг асосий қисми хизмат муддатини ўтаб бўлган транспорт воситалар.

Тошкент шаҳар транспорт бошқармаси томонидан ана шу жиҳатлар инобатга олиниб, хусусий корхоналар олдига ўз ҳаракат таркибини янгилаш вазифаси қўйилган.

Маълум қинишича, «Автосантранс-сервис» МЧЖ 9 та янги автобус харид қилган. Хитойнинг Yutong Hongkong limited компанияси томонидан ишлаб чиқарилган мазкур автобуслар газ ёқилғисида ҳаракатланади. Бу атроф-муҳитга етадиган зарарнинг камайишига олиб келиш билан бирга, муқобил ёқилғи турларидан кенг фойдаланиш имконини беради. Қолаверса, газнинг суюқ ёқилғига нисбатан бир неча баробар арзонлиги корхонанинг иқтисодий самарадорлигига ҳам ижобий таъсир ўтказади.

Умумий 52 нафар йўловчига мўлжалланган ушбу автобуслар ўрта сиғимли бўлиб, 30 та ўриндиққа эга.

Ишлаб чиқарувчи корхона ушбу транспорт воситаларининг 150 минг километргача бенуқсон ҳаракатланишига кафолат бермоқда.

Ушбу автобуслар пойтахт йўлларида қатнаётган хусусий корхонага тегишли эски Isuzu русумидаги автобуслар ўрнида ҳаракатланиши режалаштирилган.

Маълумот учун, «Автосантранс-сервис» МЧЖ «Тошшаҳартрансхизмат» АЖ тизимидаги хусусий корхоналардан бири ҳисобланади.

Эслатиб ўтамиз, Тошкент ҳокими Жаҳонгир Ортиқхўжаев ва «Белкоммунмаш» раҳбари Владимир Корол ўртасида 2018 йил сентябрида бўлиб ўтган музокаралар якунига кўра, Беларусь электробусларидан бирини Тошкентда синаб кўриш бўйича келишувга эришилган эди. 450 минг долларга харид қилинган биринчи электробус Тошкентда 13 сентябрдан ҳаракатланишни бошлаганди. Тошкент шаҳар ҳокимлиги бундай электробуслар сони 10 та етказилишини маълум қилган. Шу йилнинг март ойидан бошлаб эса Тошкентнинг 52-автобус йўналиши (Бешёғоч—Юнусобод) бўйлаб Хитойнинг Yutong электробуси синов тариқасида қатнай бошлаганди.