Hayitlik puli olmagan Farg‘ona neftni qayta ishlash zavodi ishchilari Prezidentga murojaat qildi. Zavod rahbariyati bunga munosabat bildirdi

Farg‘ona neftni qayta ishlash zavodining bir guruh xodimlari Qurbon hayiti bayramida ajratilgan pulni olmagani va zavod rahbariyatidan norozi ekanini bildirib, Prezident Shavkat Mirziyoyevga videomurojaat yo‘lladi.

“Hayitda, musulmonlar bayramida, hayotda birinchi marta bo‘lishi bu. O‘zingiz boshchiligingizda bizga musulmonlar bayrami munosabati bilan hammaga pul tarqatib berdiz. Lekin bizni zavodda pul berilmadi.

Pandemiya vaqtida kasaba uyushmasi raisi Abdurashid Saidaliyev o‘zini saylab olib, ertasiga mukofot pullarimiz, bayram pullarimizni hammasini qirqib tashladi”, – deydi murojaatchilardan biri.

Uning ta’kidlashicha, avvalgi rahbarlar vaqtida bunday holat bo‘lmagan. Hatto 2013-yil zavod daromadsiz tarzda yilni yakunlaganda ham bayram pullari berilgan.

“Isomov direktor bo‘lib kelganida, pandemiya vaqtida oziq-ovqatlar hatto maishiy jihozlarning o‘z narxida tarqatilgan. Lekin Isomov ketgandan keyin 2 oy ichida zavod Jizzax Petrolium’ga topshirildi. Shundan beri zavod ‘ubitka’da. Hozirgi vaqtda 6-sex boshlig‘i Ikrom Shodmonovning aytishicha, 61 milliard ‘ubitka’da chiqibmiz ekan. Sababi nima? Shunga izoh beringlar. Jizzax Petrolium tagida kim bor? Uni kim boshqaryapti?

Iltimos, bizga sobiq direktorimiz Adhamjon Isomov  Azamovichni qaytarib berishingizni so‘raymiz”, – deb murojaatni yakunlagan xodimlardan biri.

Bu holat bo‘yicha FNQIZ rahbariyati munosabat bildirib chiqqan. Unda murojaat qilganlar bilan tushuntirish ishlari olib borilgani ma’lum qilingan.

“Farg‘ona neftni qayta ishlash zavodi bir guruh ishchilari tomonidan 3-avgust kuni zavodning kirish qismida video murojaat qilindi. Ushbu masalaga oydinlik kiritish maqsadida 4-avgust kuni hokimlik vakillari, huquq-targ‘ibot xizmati organlari vakillari Farg‘ona neftni qayta ishlash zavodi rahbariyati ishtirokida mazkur murojaat muallifi zavodning 6-sex xodimlari Feruzaxon Umirzoqova hamda Feruzaxon Valixo‘jayeva bilan tushuntirish ishlari olib borildi.

Hozirgi kundagi murakkab iqtisodiy holat, jahondagi koronavirus pandemiyasi va buning zavodga ham salbiy ta’siri tushuntirib o‘tildi. Zavodda tushumning pasayishi va xarajatlarning qisqartirilishi haqida tushuntirildi.

Hozirgi kunda zavodda o‘rtacha ish haqi 3—3,5 million oralig‘ida va ular o‘z vaqtida to‘lab borilmoqda. Zavodning har bir ishchisining oylik ish haqi muqaddas hisoblanadi. Ularni o‘z vaqtida berishni burchimiz deb bilamiz. Undan tashqari, zavod xodimlari 3 mahal issiq ovqat, bepul kiyim-bosh, ishga kelib ketish uchun avtotransport vositalari bilan ta’minlangan. Shuningdek, ish vaqti haftasiga 40 soatdan oshmaydi”, — deydi Farg‘ona neftni qayta ishlash zavodi direktor o‘rinbosari Behzod Mo‘minov.

Zavod rahbariyati vakilining aytishicha, Prezident ko‘rsatmasiga amal qilgan holda qat’iy belgilangan intizom bilan bu holatdan chiqib ketish mumkin.