“Gidroksixloroxin” preparati O‘zbekistonga chet el davlatlardan gumanitar yordam sifatida kelayotgani aytildi

AOKAda 5-avgust kuni o‘tkazilgan matbuot anjumanida Koronavirusga qarshi kurash shtabi a’zosi Laziz To‘ychiyev so‘nggi paytlarda bahs-munozaralarga sabab bo‘layotgan “Gidroksixloroxin” (“Plakvenil”) preparati bo‘yicha o‘z fikrlarini bildirdi. Bu haqda “Daryo” muxbiri xabar bermoqda.

“Shu kunlarda ‘Gidroksixloroxin’ to‘g‘risida juda ko‘p muzokaralar bo‘lyaptiki, ‘Nima uchun bu preparat yana protokolga kiritildi?’, ‘Nima sababdan har bitta pog‘onada shu dori vositasidan ichish kerak?’, degan turli gap-so‘zlar tug‘ilyapti. Biz o‘zimizga savol berishimiz kerak, bundan kim manfaatdor, kim bu yerda manfaat ko‘ryapti?

Hozirgi kungacha ishlatib kelingan ‘Gidroksixloroxin’ va uning analoglari Hindiston, Polsha va kelgusida Turkiyadan keladigan bo‘lsa, bularning hammasi to‘laligicha gumanitar yordam. Bu yerda hech qanday moliyaviy qiziqish yo‘q. Bu bevosita bemorlar ahvolini yaxshilash va yengil holat og‘irlashmasligi uchun taqdim etilyapti. Demak, bundan bemor manfaatdor bo‘lmoqda. Biz yangi qo‘llanmamizda ham ‘manfaatdor bemor – manfaatdor fuqaro’ degan maqsadni qo‘ydik”, —dedi To‘ychiyev.