Ҳайитлик пули олмаган Фарғона нефтни қайта ишлаш заводи ишчилари Президентга мурожаат қилди. Завод раҳбарияти бунга муносабат билдирди

Фарғона нефтни қайта ишлаш заводининг бир гуруҳ ходимлари Қурбон ҳайити байрамида ажратилган пулни олмагани ва завод раҳбариятидан норози эканини билдириб, Президент Шавкат Мирзиёевга видеомурожаат йўллади.

«Ҳайитда, мусулмонлар байрамида, ҳаётда биринчи марта бўлиши бу. Ўзингиз бошчилигингизда бизга мусулмонлар байрами муносабати билан ҳаммага пул тарқатиб бердиз. Лекин бизни заводда пул берилмади.

Пандемия вақтида касаба уюшмаси раиси Абдурашид Саидалиев ўзини сайлаб олиб, эртасига мукофот пулларимиз, байрам пулларимизни ҳаммасини қирқиб ташлади», – дейди мурожаатчилардан бири.

Унинг таъкидлашича, аввалги раҳбарлар вақтида бундай ҳолат бўлмаган. Ҳатто 2013 йил завод даромадсиз тарзда йилни якунлаганда ҳам байрам пуллари берилган.

«Исомов директор бўлиб келганида, пандемия вақтида озиқ-овқатлар ҳатто маиший жиҳозларнинг ўз нархида тарқатилган. Лекин Исомов кетгандан кейин 2 ой ичида завод Жиззах Петролиумга топширилди. Шундан бери завод ‘убитка’да. Ҳозирги вақтда 6-цех бошлиғи Икром Шодмоновнинг айтишича, 61 миллиард ‘убитка’да чиқибмиз экан. Сабаби нима? Шунга изоҳ беринглар. Жиззах Петролиум тагида ким бор? Уни ким бошқаряпти?

Илтимос, бизга собиқ директоримиз Адҳамжон Исомов  Азамовични қайтариб беришингизни сўраймиз», – деб мурожаатни якунлаган ходимлардан бири.

Бу ҳолат бўйича ФНҚИЗ раҳбарияти муносабат билдириб чиққан. Унда мурожаат қилганлар билан тушунтириш ишлари олиб борилгани маълум қилинган.

«Фарғона нефтни қайта ишлаш заводи бир гуруҳ ишчилари томонидан 3 август куни заводнинг кириш қисмида видео мурожаат қилинди. Ушбу масалага ойдинлик киритиш мақсадида 4 август куни ҳокимлик вакиллари, ҳуқуқ-тарғибот хизмати органлари вакиллари Фарғона нефтни қайта ишлаш заводи раҳбарияти иштирокида мазкур мурожаат муаллифи заводнинг 6-цех ходимлари Ферузахон Умирзоқова ҳамда Ферузахон Валихўжаева билан тушунтириш ишлари олиб борилди.

Ҳозирги кундаги мураккаб иқтисодий ҳолат, жаҳондаги коронавирус пандемияси ва бунинг заводга ҳам салбий таъсири тушунтириб ўтилди. Заводда тушумнинг пасайиши ва харажатларнинг қисқартирилиши ҳақида тушунтирилди.

Ҳозирги кунда заводда ўртача иш ҳақи 3—3,5 миллион оралиғида ва улар ўз вақтида тўлаб борилмоқда. Заводнинг ҳар бир ишчисининг ойлик иш ҳақи муқаддас ҳисобланади. Уларни ўз вақтида беришни бурчимиз деб биламиз. Ундан ташқари, завод ходимлари 3 маҳал иссиқ овқат, бепул кийим-бош, ишга келиб кетиш учун автотранспорт воситалари билан таъминланган. Шунингдек, иш вақти ҳафтасига 40 соатдан ошмайди», — дейди Фарғона нефтни қайта ишлаш заводи директор ўринбосари Беҳзод Мўминов.

Завод раҳбарияти вакилининг айтишича, Президент кўрсатмасига амал қилган ҳолда қатъий белгиланган интизом билан бу ҳолатдан чиқиб кетиш мумкин.