Sog‘liqni saqlash vazirligi o‘zida koronavirusning har qanday alomatini sezgan fuqarolar saralash va taqsimlash markazlariga murojaat qilishlari mumkinligini ma’lum qildi.
Toshkentda koronavirus infeksiyasiga gumon qilingan yoki kasallangan bemorlarga tezkorlik bilan malakali tibbiy yordam ko‘rsatish maqsadida Davlat xavfsizlik xizmati, Mudofaa vazirligi, Ichki ishlar vazirligi, Sog‘liqni saqlash vazirligi va Toshkent shahar hokimligi tomonidan 4 ta saralash va taqsimlash markazlari tashkil qilingan.
Ular:
- 814 o‘rinli “O‘zekspomarkaz” 1—2 pavilyoni (Yunusobod tumani, Amir Temur shoh ko‘chasi, 107-uy);
- 1 000 o‘rinli “O‘zekspomarkaz” 3—4 pavilyoni (Yunusobod tumani, Amir Temur shoh ko‘chasi, 107-uy);
- 750 o‘rinli “Universal” sport majmuasi (Yunusobod tumani, Korxojiota ko‘chasi, 2A-uy);
- 520 o‘rinli “Yoshlik” sport majmuasi (Shayxontohur tumani, Paxtakor ko‘chasi, mo‘ljal: “Paxtakor” metro bekati).
O‘zida COVID-19 alomatlarini sezgan yoki bu kasallikka chalingan fuqarolar ushbu maskanlarga uch yo‘l bilan, ya’ni :
- tez tibbiy yordam mashinasida;
- oilaviy poliklinika qoshidagi mobil brigada yordamida;
- o‘zlari borishlari mumkin bo‘ladi.
Saralash va taqsimlash markazlarida jami 3084 ta o‘rin tashkil qilingan. Ushbu markazlar o‘z faoliyatini boshlanganidan buyon 3777 nafar bemor murojaat qilgan bo‘lib, shundan 2688 nafari yotqizilgan, 1336 nafari esa sog‘ayib, uylariga yuborilgan.
Hozirda COVID-19 bilan kasallangan bemorlarni saralash va taqsimlash markazlarida 1843 ta bo‘sh o‘rin mavjud.
Ushbu markazlarga joylashish bilan bog‘liq savollar bo‘lsa, Sog‘liqni saqlash vazirligining 1003 qisqa raqamli Call-markaziga murojaat qilish mumkin.
Avvalroq Zangiota sanatoriysi koronavirusga chalingan bemorlarni davolash kompleksiga aylantirilgani, Urganch shahrida koronavirus yuqtirib olgan bemorlarni davolash uchun 708 o‘rinli maxsus markazlar tashkil etilgani haqida xabar berilgan edi. Bundan tashqari, Uchtepa tumanida joylashgan Atlas mebel markazida koronavirusga qarshi kurash doirasida navbatdagi taqsimlash markazi tashkil etilayotgani xabar qilingan edi.
Izoh (0)