Мактабгача таълим ташкилотларида коронавирус инфекцияси пандемияси сабабли тўхтатилган фаолият жараёнини тиклашга тайёргарлик ишлари олиб борилмоқда, деб хабар бермоқда Мактабгача таълим вазирлиги ахборот хизмати.
Маълум қилинишича, боғчалар фаолиятини тиклашдан мақсад, ходимлар ва тарбияланувчилар учун хавфсиз муҳитни таъминлаш орқали, болаларни нормал маиший ҳаёт, ўйинлар ва таълим жараёнига қайтаришдир.
Бунда вирус тарқалиши ва уни юқтириб олиш хавфини бартараф этиш мақсадида жорий этилган тақиқ чораларини ҳисобга олган ҳолда, қўшимча хавфсизлик чоралари ҳам татбиқ этилиши кўзда тутилган. Аммо, болалар ўртасидаги оралиқ масофа, уларнинг ижтимоий фаоллиги, амалий машғулотлари ва ривожлантирувчи ўйинларига халақит бермаслиги лозимлиги таъкидланган
Мактабгача таълим вазирлиги БМТ Болалар жамғармаси ЮНИСЕФнинг кўмагида пандемия шароитида МТТларда иш жараёни қандай тамойиллар асосида ташкил этилиши тасвирланган видеоролик тайёрлади. Унда мактабгача таълим муассасаси пандемия вақтида фаолиятни ташкил этиш борасида кўрсатмалар берилган. Хусусан:
– болалар боғчаси яшил ёки сариқ ҳудудда бўлиши керак;
– ходимлар коронавирус тарқалишининг олдини олиш бўйича ўқитилган бўлиши лозим;
– боғча биноси ва ҳудуди дезинфекция қилиниши шарт;
– мактабгача таълим ташкилотида узлуксиз сув таъминоти тизими ёки етарли миқдорда сув захираси бўлиши шарт;
– ҳар бир гуруҳ учун болаларнинг боғчага келиши жадвали бўлиши керак;
– ҳар душанба куни ота-оналар пакетга солинган бир марталик қоғоз сочиқлар ёки кўп марта ишлатиладиган бешта тоза сочиқлар, ишлатилган сочиқлар учун алоҳида пакетлар олиб келишлари керак;
– боғчага келаётган болаларда тиббий ниқоб бўлиши ва кириш жойида 2 метрлик ижтимоий масофа сақланиши зарур;
– боғчага ўйинчоқлар, озиқ-овқат маҳсулотлари ва ичимликлар олиб келиш тақиқланади.
Таъкидланишича, МТТ ходимлари боғчага келган тарбияланувчиларнинг тана ҳароратини ўлчаб, маълумотларни ёзиб боришлари талаб этилади. Агар болада ёки МТТ ходимида иситма, йўтал ёки ўткир респираторли инфекцияларнинг бошқа белгилари бўлса, уларни боғчага киритиш мумкин эмас. Агар боланинг тана ҳарорати нормада бўлса, унинг қўллари дезинфекция қилиниб боғчага киритилади. Ота-оналарнинг боғча ҳудудига киришларига йўл қўйилмайди.
Видеода боғчадаги ҳар бир гуруҳда 15 нафардан кўп бола бўлмаслиги тавсия қилинган. Шунингдек, машғулотлар ва овқатланиш вақтида болалар орасида камида 1 метрлик масофа таъминлашини шартлиги таъкидланган.
https://www.youtube.com/watch?v=Fih2xWl2Hzg&feature=youtu.бе
Аввалроқ, Ўзбекистонда болани боғчага жойлаштириш учун ариза бериш хизмати қайта ишга туширилгани ҳақида хабар берилган эди.
Изоҳ (0)