Qashqadaryo viloyati markazi Qarshi shahri barcha avtomobillar uchun ochildi. 2020-yil 3-avgust soat 07:00 dan boshlab shaharga belgilangan vaqtda kirib-chiqish mumkin bo‘ladi. Bu haqda xabar bergan “Daryo” muxbirining ma’lumot berishicha, shaharga mavjud yettita blokpostdan kirib-chiqish boshlangan.
“Bugun soat 07:00 dan boshlab shaharga faqat kirish bo‘lyapti. Kamdan kam hollarda chiqilmoqda”, — deydi blokpostda turgan IIB xodimi.
Ta’kidlash lozim, Qarshi shahri 27-iyuldan boshlab yopilgani, 15-avgustga qadar shaharda barcha avtomobillar harakati cheklangani haqida xabar berilgandi.
Viloyat maxsus komissiyasining 2020-yil 31-iyuldagi qaroriga ko‘ra, 3-avgustdan boshlab avtotransport vositalarida maxsus ruxsatnomasiz harakatlanishga, shuningdek, Qarshi shahriga kirish-chiqishga faqatgina kunning muayyan vaqtida — soat 07:00 dan 10:00 gacha va 18:00 dan 21:00 gacha tegishli hudud doirasida harakatlanishga ruxsat beriladi. Bunda avtomobillar harakatiga fuqarolarning ish joyiga borib-kelishi, dori vositalari, oziq-ovqat va birinchi galdagi mahsulotlarni xarid qilish uchun ruxsat etiladi.
Shuningdek, maxsus komissiya yo‘nalishsiz taksilar sonini ikki barafarga ko‘paytirish haqida qaror qilgandi.
“Daryo” muxbiri bilan suhbatlashgan viloyat transport boshqarmasi boshlig‘i Sherzod Norboboyevning ma’lumot berishicha, shaharda kuchaytirilgan karantin paytida 250 ta yo‘nalishsiz taksi faoliyat yuritgan bo‘lsa, 3-avgustdan boshlab ularning soni 500 taga yetkazilgan.
“Yo‘nalishsiz taksilarga faqat ikki nafar yo‘lovchi olishga ruxsat etilgan. Shu boisdan ham transport boshqarmasi xodimlari taksilar faoliyatini nazorat qilib, narx oshib ketmasligi va karatin qoidalariga amal qilinishini kuzatadi”, — deydi boshqarma boshlig‘i.
“Shaharda yana hayot qaynayapti. Hamma o‘z tashvishi bilan ovora. Kimdir shaharga kiryapti, yana kimdir esa chiqmoqda. YPX xodimlari esa yana tezlikni o‘lchab, o‘zboshimcha haydovchilarni ‘ovlash’ni boshladi”, — deydi “Daryo” muxbiri bilan suhbatlashgan yo‘lovchi.
Eslatib o‘tamiz, O‘zbekistonda kuchaytirilgan karantin 2020-yilning 15-avgustiga qadar uzaytirilgan.
Izoh (0)