Kislorod beruvchi apparatlar, PZR-test, MSKT bor klinikalarda onlayn navbatni tashkil qiluvchi yangi Telegram-bot ishga tushirildi. Bu haqda bugun AOKA huzuridagi shtabdagi brifingda Yoshlar ishlari agentligi matbuot kotibi Nodir Abduqodirov ma’lum qildi.
Brifingda 14-iyuldan 1-avgustga qadar Homiylik xayriyalarini muvofiqlashtirish markazlariga jami 108 755 ta murojaat kelib tushgani, mazkur markazlar tomonidan 194 214 ta ehtiyojmand oilaga xayriya yordamlari ko‘rsatilgani aytildi.
Agentlik axborot xizmati rahbarining so‘zlariga ko‘ra, homiylik xayriyalarini muvofiqlashtirish markazlaridagi jami 3 060 nafar volontyor yoshlardan 682 nafari Call-markazlarda aholi murojaatlarini qabul qilishga hamda 2 378 nafari xonadonlarga mahsulotlar yetkazib berishga ko‘maklashmoqda.
“2-avgust soat 14:00 ga qadar mazkur platforma orqali 2750 ga yaqin ko‘ngillilar ro‘yxatdan o‘tdi va malakali mutaxassislar tomonidan ularni o‘qitish ishlari amalga oshirilmoqda. Yoshlar ishlari agentligi tomonidan internet tarmog‘ida volontyor.uz platformasi ishga tushirildi. Mazkur platforma orqali respublikadagi barcha insonlar ko‘ngilli sifatida ro‘yxatdan o‘tish imkoniyati paydo bo‘ldi. Shuningdek, Toshkent shahridagi qaysi klinikalarda MRT va MSKT uskunalari borligi, qaysi holatda klinikaga murojaat qilish mumkinligi, tuman kesimida eng yaqin va faoliyat yuritayotgan klinikalar haqida batafsil ma’lumot bera oladigan (71) 200 17 20 Call-markazi faoliyat olib bormoqda. Markazda 12 nafar Yoshlar ishlari agentligi ko‘ngilli yoshlari faoliyati yo‘lga qo‘yildi.
Telegram’da @Shifoline_bot ishga tushirildi. Mazkur botning vazifasi Toshkent shahrida joylashgan MSKT, PZR, kislorod beruvchi apparatlari bor klinikalarda onlayn navbatni tashkil qilishdan iborat. Toshkentda Yoshlar markazida faoliyati yo‘lga qo‘yilgan 1105 qisqa raqamli Call-markazida jami 40 nafar malakali shifokor, Sog‘liqni saqlash vazirligidan xodimlar va Yoshlar ishlari agentligining ko‘ngilli yoshlari faoliyat olib bormoqda. Mazkur Call-markazga 17 kun ichida 76894 ta murojaat kelib tushdi va malakali mutaxassislar tomonidan ko‘rib chiqilib murojaatchilarga tegishli tavsiyalar berildi”, – deya ma’lumot bergan Yoshlar ishlari agentligi matbuot kotibi Nodir Abduqodirov.
2020-yil 20-iyulda “Troll.uz” loyihasi rahbari Umid G‘ofurov tashabbusi bilan Telegram’da muhtojlarga yordam berishga mo‘ljallangan “Yaqinlar” boti ishga tushirilgani xabar qilingan. 23-iyulda Mahalla va oilani qo‘llab-quvvatlash vazirligi axborot xizmati rahbari Saodat Boymirzayeva 2020-yilning 14-iyulidan 22-iyuligacha respublika miqyosida jami 145 ming 154 ta moddiy daromad manbasini yo‘qotgan, ishsiz va ehtiyojmand oilalarga 14 milliard 67 million so‘mlik oziq-ovqat mahsulotlari yetkazilgani, 330 ta oilaga qiymati 52 million 400 ming so‘m miqdordagi dori-darmonlar ham tarqatilganini ma’lum qilgandi.
Izoh (0)