Қашқадарё вилояти маркази Қарши шаҳри барча автомобиллар учун очилди. 2020 йил 3 август соат 07:00 дан бошлаб шаҳарга белгиланган вақтда кириб-чиқиш мумкин бўлади. Бу ҳақда хабар берган «Дарё» мухбирининг маълумот беришича, шаҳарга мавжуд еттита блокпостдан кириб-чиқиш бошланган.
«Бугун соат 07:00 дан бошлаб шаҳарга фақат кириш бўляпти. Камдан кам ҳолларда чиқилмоқда», — дейди блокпостда турган ИИБ ходими.
Таъкидлаш лозим, Қарши шаҳри 27 июлдан бошлаб ёпилгани, 15 августга қадар шаҳарда барча автомобиллар ҳаракати чеклангани ҳақида хабар берилганди.
Вилоят махсус комиссиясининг 2020 йил 31 июлдаги қарорига кўра, 3 августдан бошлаб автотранспорт воситаларида махсус рухсатномасиз ҳаракатланишга, шунингдек, Қарши шаҳрига кириш-чиқишга фақатгина куннинг муайян вақтида — соат 07:00 дан 10:00 гача ва 18:00 дан 21:00 гача тегишли ҳудуд доирасида ҳаракатланишга рухсат берилади. Бунда автомобиллар ҳаракатига фуқароларнинг иш жойига бориб-келиши, дори воситалари, озиқ-овқат ва биринчи галдаги маҳсулотларни харид қилиш учун рухсат этилади.
Шунингдек, махсус комиссия йўналишсиз таксилар сонини икки барафарга кўпайтириш ҳақида қарор қилганди.
«Дарё» мухбири билан суҳбатлашган вилоят транспорт бошқармаси бошлиғи Шерзод Норбобоевнинг маълумот беришича, шаҳарда кучайтирилган карантин пайтида 250 та йўналишсиз такси фаолият юритган бўлса, 3 августдан бошлаб уларнинг сони 500 тага етказилган.
«Йўналишсиз таксиларга фақат икки нафар йўловчи олишга рухсат этилган. Шу боисдан ҳам транспорт бошқармаси ходимлари таксилар фаолиятини назорат қилиб, нарх ошиб кетмаслиги ва каратин қоидаларига амал қилинишини кузатади», — дейди бошқарма бошлиғи.
«Шаҳарда яна ҳаёт қайнаяпти. Ҳамма ўз ташвиши билан овора. Кимдир шаҳарга киряпти, яна кимдир эса чиқмоқда. ЙПХ ходимлари эса яна тезликни ўлчаб, ўзбошимча ҳайдовчиларни ‘овлаш’ни бошлади», — дейди «Дарё» мухбири билан суҳбатлашган йўловчи.
Эслатиб ўтамиз, Ўзбекистонда кучайтирилган карантин 2020 йилнинг 15 августига қадар узайтирилган.
Изоҳ (0)