O‘zbekistonda koronavirus bilan kasallanib vafot etayotgan bemorlarda COVID-19 laboratoriya tahlillarida tasdiqlansagina ular rasmiy statistikaga qo‘shilmoqda. COVID-19 kasalligining klinik belgilari kuzatilgan, ammo kasallik laboratoriya tahlilida tasdiqlanmagan o‘limlar ayni paytda rasmiy statistikaga qo‘shilmayapti. Bu haqda 30-iyul kuni o‘tkazilgan brifingda koronavirusga qarshi kurash shtabi a’zolari Habibulla Oqilov va Anvar Alimov ma’lum qildi.
Anvar Alimovning aytishicha, Jahon sog‘liqni saqlash tashkilotining Yevropa byurosi bir qator mamlakatlar, xususan, O‘zbekiston bilan koronavirus oqibatida yuzaga keladigan o‘limlarni hisobga olish bo‘yicha muhokamalar olib borgan. Muhokamalarga ikkita masala qo‘yilgan.
Birinchi masala — COVID-19 tasdiqlangan bemorlarning o‘lim ko‘rsatkichi. Ikkinchi masala esa kasallik tashxisi laborator jihatdan qo‘yilmagan, ammo klinik belgilar mavjudligi natijasida kelib chiqadigan o‘limlarni COVID-19 natijasida yuzaga keladigan o‘limlar soniga qo‘shish hisoblanadi.
“Hozir Rossiya buni qabul qila boshladi, Qozog‘iston avgust oyidan boshlab o‘tishga kelishdi. Biz ham keyingi yig‘ilishda ko‘rib chiqmoqchimiz. Komissiyaga tavsiya beramiz. Komissiya tavsiyamizni qabul qilsa, unda COVID-19 tashxisi laboratoriyada PZR tahlili bilan qo‘yilgan qatorida shu tashxis qo‘yilmagan, ammo klinik belgilari bo‘lgan, o‘pka zotiljami yoki boshqa holatlar bilan vafot etganlarni ham shu guruhga qo‘shish masalasini keyingi yig‘ilishlarga qo‘yamiz. Shu asosda Yevropa bergan tavsiyaga biz o‘z munosabatimizni bildiramiz”, — dedi Anvar Alimov.
Shtab vakilining so‘zlariga ko‘ra, koronavirus o‘limlari bilan bog‘liq chalkash holatning sababi shundaki, COVID-19’ga mo‘ljallangan shifoxonalarda vafot etayotganlar haqidagi ma’lumotlar o‘sha kuni yoki keyinroq berilmoqda, biroq COVID-19’ga mo‘ljallanmagan kasalxonada koronavirusning klinik belgilari bilan vafot etgan bemorlar COVID-19 qurbonlari guruhiga qo‘shilmayapti.
Habibulla Oqilovning qayd etishicha, koronavirus belgilari bilan uy sharoitida davolanib, ahvoli og‘irlashgach kasalxonaga olib kelingan, ammo koronavirusga tahlil olishga ulgurmay vafot etgan bemorlar COVID-19 qurbonlari qatoriga qo‘shilmagan. Shuning hisobiga chalkashliklar bo‘lishi mumkin.
Uning so‘zlariga ko‘ra, koronavirusning klinik belgilari bilan vafot etgan, ammo kasallik laborator tahlilda aniqlanmagan bemorlarni COVID-19 qurbonlari soniga qo‘shish haqidagi taklif ma’qullansa, raqamlardagi chalkashliklar yo‘qoladi.
Shu paytga qadar Sog‘liqni saqlash vazirligi mamlakatda 134 kishining koronavirusdan vafot etgani haqida xabar bergan. “Daryo” hisobi bo‘yicha koronavirusga chalingach, vafot etganlar soni 140 nafarni tashkil etmoqda.
Davlat xizmatlari agentligi 15-iyul kuni Navoiy viloyatidagi 61 yoshli xodimi Adhamjon Dehqonov, Madaniyat vazirligi esa 18-iyul kuni 32 yoshli xodimi Akmal Irisov koronavirus asoratlaridan vafot etgani, Olmaliq shahri hokimligi 9 va 15-iyul kunlari shahar shifoxonalarida vafot etgan ikki ayolda koronavirus tasdiqlangani haqida xabar bergan.
Shuningdek, 22-iyulda Bosh prokurorning sobiq o‘rinbosari, Qoraqalpog‘iston prokuraturasida bo‘lim boshlig‘i bo‘lib ishlayotgan 66 yoshli Hakimbay Xalimov, Chilonzor tumani Sanitariya-epidemiologik osoyishtalik markazi bakteriologiya laboratoriyasi mudiri 62 yoshli Marhabo Ahmedova koronavirus asoratlaridan vafot etgani xabar qilingan. Biroq ushbu olti holat haqida SSV tomonidan ayni vaqtgacha axborot berilmagan.
Bundan tashqari, taniqli rejissor Sarvar Karimov ham 17-iyul kuni otasi koronavirus infeksiyasidan vafot etgani, ammo unga tashxis qo‘yilmaganini ma’lum qilgandi. Rejissorning o‘zi va uning boshqa oila a’zolarida koronavirus tasdiqlangan. Shuningdek, 26-iyul kuni bosh vazir o‘rinbosari Aziz Abduhakimov 24-iyul kuni Samarqanddagi Ipak yo‘li xalqaro turizm universitetining 33 yoshli magistranti O‘tkir Temirov kasallikdan vafot etganini aytgan. Ma’lum bo‘lishicha, marhum o‘zida COVID-19’ning barcha belgilari bo‘lsa-da, test ham topshira olmagan, kasalxonaga ham yota olmagan. Qoraqalpog‘istonning Taxtako‘pir tumani shifoxonasining 32 yoshli tez tibbiy yordam hamshirasi Aliya Jiyemuratova 28-iyul kuni koronavirusdan vafot etgani haqida “Makan.uz” xabar tarqatdi.
Izoh (0)