Andijon viloyatining Paxtaobod tumani “Qayir” mahallasida yashovchi aholi hududda elektr ta’minotida muammo borligini, mazkur masala uch yildan buyon yechimini topmayotganini aytib, shikoyat qildi. “Daryo”ga murojaat qilgan aholining aytishicha, mas’ullar aholini uch yildan beri aldab keladi.
“Daryo” muxbiri Umidjon Mamarasulov voqea tafsilotlarini o‘rganish maqsadida hududda bo‘ldi.
Aytilishicha, aholi yashovchi hudud Prezidentning 2016-yil 23-noyabrdagi qaroriga asosan tuman elektr tarmoqlari korxonasi tomonidan ishlab chiqilgan 2017—2021-yillarda aholi turar joy massivlarida yangi elektr tarmoqlarini rekonstruksiya va modernizatsiya qilish bo‘yicha dasturga kiritilgan. Shunga ko‘ra, Miyanda ko‘chasiga 2019-yilning avgust—sentabr oylarida bir dona transformator o‘rnatish va yangi tarmoq tortish belgilangan. Biroq bu ish qog‘ozda yozilganicha qolgan. Fuqarolar bu haqda barcha tashkilotlarga murojaat qilgan. Ammo natija yo‘q.
“2018-yil mahallamizda joylashgan 39-maktabda sobiq prokuror ishtirokida yig‘ilish o‘tkazilgandi. Ko‘chamizdagi elektr energiyasi bilan bog‘liq muammo bir necha marotaba ko‘tarilgan. O‘shanda tuman elektr tarmoqlari korxonasi bosh muhandisi Ismoiljon 2018-yilning ikkinchi choragida ko‘chamizda nafaqat transformator, simyog‘ochlar ham o‘rnatilib, tomma-tom ulangan simlar qolmasligini va’da bergandi. ‘Katta’larning oldida og‘zini ko‘pirtirib gapirgani uchun so‘zlariga ishonganmiz. Afsuski, 2018-yil tugul 2020-yilda ham hech qanday o‘zgarish bo‘lmadi. Keyin bilsak, ko‘chamizning dasturga kiritilgani yolg‘on ekan”, — deydi mahalla faollari.
Aholi vakillaridan Mutalibjon Abdukarimovning aytishicha, mavjud elektr toki orqali faqat chiroqni yoqish hamda televizor ko‘rish imkoniyati bor xolos.
“Olti yildan buyon elektr toki masalasida qiyinchiliklarga duch kelamiz. Qish kelishi bilan yuragimiz bezillaydi. Sababi tokning pastligi, tez-tez bo‘ladigan uzilishlardan charchaganmiz. Ko‘rgan bo‘lsangiz ko‘cha boshida bitta yog‘och ustun bor. U ham talabga javob bermaydi. O‘sha ‘stolba’dan bir qo‘shnimiz o‘ziga sim tortgan. Qolganlar esa qo‘shni xonadonning tomlari orqali ulama tarzda olib kelganmiz. Natijada tokning quvvati oxirgi uyga yetib bormaydi. Bunday holatda tokdan unumli foydalanishning imkoniyati yo‘q. Uyimizga kirsangiz, o‘zingiz guvohi bo‘lasiz. Shu tok orqali bitta lampochka yoqishimiz va xira bo‘lsa ham televizor ko‘rishimiz mumkin. Qo‘shimcha boshqa biror texnikani ishlatolmaymiz. Negaki 220 voltdagi kuchlanish borib-borib, 160 ga yoki undan ham pastga tushib ketadi. Elektr orqali foydalaniladigan maishiy jihozlarning yangisini olamiz, desak bunaqa holatda mablag‘imizga kuyishimiz aniqligini o‘ylab, eski texnikalarni ishlatishda davom etyapmiz”, — deydi Mutalibjon Abdukarimov.
“Kuz kelishi bilan kunning qisqarishi natijasida kechga yaqin ‘svet’ nuri ham pasayadi. Tabiiyki bu paytda farzandlarimiz dars qilishi kerak. Tok past bo‘lishiga qaramay ular uy vazifalarini bajarishga harakat qilishadi. O‘qitmay desangiz, kelajak shularniki. Sharoit yaratib beray desangiz, shu muammo necha yildirki hal bo‘lmaydi. Biz kattalar-ku mayli yoshimiz o‘tib boryapti, deymiz, lekin bolalarimizning salomatligiga putur yetayotganini ko‘rib achinasan”, — deydi Mutalibjon Abdukarimov.
“Qayir” mahalla fuqarolar yig‘ini raisi Ulug‘bek Bekboyevning aytishicha, aholini qiynayotgan eng katta muammo — shu. Ushbu muammodan sektor rahbarlari va boshqa mutasaddilarning ham xabari bor.
“To‘rt yildan buyon shu mahallada rais sifatida mehnat qilib kelaman. Nolimaymiz, sekin-astalik bilan bo‘lsa ham mavjud muammolar birin-ketin hal qilinmoqda. Biroq bizni qiynayotgan eng katta muammo — beton ‘stolba’larni o‘rnatish hamda yangi elektr tarmoq liniyalarini tortish bo‘lib qolgan. Ko‘rib turganingizdek, talabga javob bermasa-da, aholi o‘zining moliyaviy sharoitidan kelib chiqib, yog‘och ustunlar o‘rnatib, simlar tortib olgan. Aksariyat xonadonlarga razm solsangiz, tomma-tom o‘zlariga sim tortib olishganini ham ko‘rishingiz mumkin. Bu talab javob bermaydi. Ushbu muammodan sektor rahbarlari va boshqa mutasaddilarning ham xabari bor”, — deydi Ulug‘bek Bekboyev.
Bekboyevning qo‘shimcha qilishicha, yuqori tashkilotlar tomonidan har oyda mavjud muammo va kamchiliklar to‘g‘risida ma’lumotlar so‘raladi. Shunday bo‘lsa-da, kutilgan natijadan hech qanday darak yo‘q.
“Mahallamizda to‘rtta asosiy ko‘cha bor. Har bir ko‘chaning hisob-kitobini chiqarib, jami 210 ta ‘stolba’ zarurligini bildirganmiz. Har oyda yuqori tashkilotlar tomonidan aholini qiynayotgan muammo va kamchiliklar so‘raladi. Ishonasizmi, mahalla uchun nima kerakligi yod bo‘lib ketgan. Yo‘llarni asfaltlash, elektr energiyasi, ichimlik suvidagi muammolar yetarlicha. Shunga asosan har safar ma’lumot beramiz. Tegishli tashkilotlar tez orada hal bo‘lishini aytishsa-da, lekin shu kungacha hech qanday natijadan darak yo‘q. Saylovda bizga ishonch bildirgan mahalladoshlarimiz hattoki bugungi kunga kelib hech qaysi so‘zimizga ishonishmay qo‘yishgan”, — deydi Ulug‘bek Bekboyev.
Raisning ta’kidlashicha, transformator mart oylarida olib kelingan bo‘lsa-da, o‘rnatilmagan.
Paxtaobod tuman elektr tarmoqlari korxonasi bosh muhandisi Ismoil Usmonovning aytishicha, transformator ishlar boshlanganini bildirish hamda murojaatchilarning vaqtincha bo‘lsa-da, “tilini tiyish” uchun olib kelingan.
“Ushbu hududdagi muammo aholining e’tirozlaridan kelib chiqib o‘rganilgan. Shunga asosan 2020-yil uchun manzilli dasturga kiritilgan. Transformator haqida gapiradigan bo‘lsak, aslida buni omborimizga tushirishimiz kerak edi. Aholining e’tirozi va talabini inobatga olgan holda murojaatlarni e’tiborsiz qoldirmayapmiz, degan ma’noda shu yerga tushirganmiz. Bundan tashqari shu orqali fuqarolarga ishlar boshlanganini ham bildirmoqchi bo‘lganmiz. O‘zi tartib bo‘yicha esa tuman omborimizda saqlashimiz kerak. Transformator bilan birga 10 ta ustun ham olib kelingan. Ustunlar faqat ushbu ko‘cha uchun emas, aksincha ushbu mahalla hududini elektrlashtirish maqsadida keltirilgan. Kengroq joy, deb shu transformatorning oldiga tushirganmiz”, — deydi Ismoil Usmonov.
Ismoil Usmonovning ma’lum qilishicha, mahallada ishlar dastur bo‘yicha uchinchi chorakda amalga oshiriladi.
“Ushbu mahallaga dastur doirasida 1,5 kilometr uzunlikdagi 0,4 tarmoq tortiladi. Bundan tashqari 300 metr uzunlikdagi 10 kilovolt kuchlanishdagi tarmoq quriladi. Shuning ichida tarmoq uchun tayanch ustunlar, sim kabeli, ochiq simi – umumiy olganda, noldan boshlab hammasi bajariladi. ‘Stolba’lar belgilangan tartiblar doirasida bir kilometrga qancha kerak bo‘lsa, shuncha qo‘yiladi. Hozirda tumandagi boshqa hududlarda barcha ishlar dastur doirasida bosqichma-bosqich qilib borilmoqda. Hech qanday muammosiz uchinchi chorakda dasturdagi ishlar amalga oshiriladi”, — deydi Ismoil Usmonov.
Ikkinchi sektor kotibi Bobirmirzo Ibrohimovning aytishicha, ushbu muammoni bartaraf etish maqsadida sektor rahbari – tuman prokurori viloyat elektr tarmoqlari korxonasi bosh direktoriga xat bilan murojaat qilgan.
“Fuqarolar tomonidan ushbu masala bir necha marotaba ko‘tarilgan. Muammo ikki yildan buyon hal bo‘lmagan. Shundan keyin 2019-yilning noyabr oyida vakolatimiz doirasida viloyat hududiy elektr tarmoqlari korxonasiga amaliy yordam so‘rab, murojaat qilganmiz. O‘shanda ulardan ushbu hudud 2020-yilga mo‘ljallangan manzilli dasturga kiritilganligi aytilib, birinchi chorak davomida amalga oshirish choralari ko‘riladi, degan mazmundagi javob xati olingan”, — deydi Bobirmirzo Ibrohimov.
Paxtaobod tuman elektr ta’minoti korxonasi rahbari Anvar Umaraliyevning aytishicha, birinchi chorakda qilinishi belgilangan ishlar karantin tufayli to‘xtab qolgan. Bundan tashqari mana shu sabab bo‘lib, zarur xomashyolarning ham kelishi to‘xtagan.
Murojaatchilarning xabar berishicha, jurnalistik surishtiruvdan so‘ng tuman elektr tarmoqlari korxonasi mutasaddilari mahalla faollari bilan uchrashuv o‘tkazgan. Uchrashuv mobaynida mazkur muammo yuzasidan jurnalistlarga murojaat qilingani sabab qilinishi kerak bo‘lgan ishlar 2020-yil davomida ham, undan keyingi yillarda ham hal qilinmasligi aytilgan. Aholini shu tarzda jazolashga qaror qilingani bildirilgan.
“Daryo” voqealar rivojini kuzatishda davom etadi.
Izoh (0)