AQSh prezidenti Donald Tramp COVID-19 koronavirus infeksiyasiga qarshi vaksinasini boshqa mamlakatlarga yetkazib berish imkoniyatini istisno qilmadi. Bu haqda Oq uyga tayanib “RBK” xabar berdi.
“Biz sun’iy nafas oldirish moslamalari kabi vaksinani ham dunyoning boshqa qismlariga ko‘p miqdorda yetkazib berishimiz mumkin”, – dedi Tramp.
Trampning ta’kidlashicha, vaksina AQShga kelganida tezda mamlakat bo‘ylab tarqaladi. AQSh vaksina barcha kerakli tasdiqlarni olgan zahoti 100 million dozani ishlab chiqarishga tayyor bo‘ladi va shundan keyin mamlakat 500 million dozada ishlab chiqarishni boshlaydi.
Eslatib o‘tamiz, AQShda 27-iyul kuni Moderna biotexnologik kompaniyasining COVID-19 vaksinasini sinovining uchinchi, yakuniy bosqichi boshlandi. Sinovda 30 ming kishi ishtirok etmoqda. Xabarlarga ko‘ra, bu SARS-CoV-2 koronavirus vaksinasining dunyodagi eng yirik klinik sinovidir.
Shuningdek, Rossiya Mudofaa vazirligi ham koronavirusga qarshi vaksina yaratilganini xabar qilgan. Uni ishlab chiqarish avgust oyida boshlanishi mumkin. Shuningdek, Buyuk Britaniyaning 90 million dozalik COVID-19 vaksinasiga buyurtma bergani haqida ham xabar berilgan edi.
Izoh (0)