Toshkent shahrida yashagan 64 yoshli A.A. ismli ayol koronavirus asoratlari oqibatida vafot etdi. Bu haqda Sog‘liqni saqlash vazirligi xabar bergan.
Qayd etilishicha, Toshkent shahar Chilonzor tumanida yashagan 64 yoshli A.A.da 2020-yil 17-iyul kuni COVID-19 infeksiyasi borligi tasdiqlangan. Bemor COVID-19 infeksiyasining o‘ta og‘ir kechishi hamda ikki tomonlama pnevmoniya tashxisi bilan Virusologiya ITI klinikasiga yotqizilgan.
Xastalik o‘tkir yurak qon-tomir va nafas yetishmovchiligi va o‘pka shishi asoratlari bilan kechgan. Shuningdek, bemor yurak ishemik kasalligi, stabil zo‘riqish stenokardiyasi, gipertoniya kasalligi va semizlikning 3-darajasi kabi hamroh kasalliklar bilan ham og‘rigan.
“Mutaxassislar tomonidan reanimatsion choralar ko‘rilganiga qaramay, bemorning ahvoli keskin og‘irlashib, o‘tkir nafas va yurak qon-tomir yetishmovchiligi hamda o‘pka shishidan vafot etdi”, – deyiladi SSV xabarida. Vazirlik axborotida bemorning qachon vafot etganiga aniqlik kiritilmagan.
Avval SSV 4 kundan buyon ketma-ket koronavirusga chalingan homilador ayollarning o‘limi haqida, xususan, 24-iyul kuni qashqadaryolik 35 yoshli ayol, 25-iyul kuni toshkentlik 34 yoshli ayolning homiladorlik vaqtida koronavirus tasdiqlangach hayotdan ko‘z yumgani, 26-iyulda esa Toshkent shahrida koronavirusga chalingan 32 yoshli ayolning vafot etgani, 27-iyulda Toshkentda 35 yoshli yana bir homilador ayolning COVID-19 asoratlari tufayli vafot qilgani haqida xabar berilgan.
Sog‘liqni saqlash vazirligi hisobi bo‘yicha 64 yoshli A.A. O‘zbekistonda koronavirusning 121-qurboni bo‘ldi. “Daryo” hisobi bo‘yicha koronavirus bilan xastalanib, COVID-19 asoratlari oqibatida vafot etganlar soni 127 nafarni tashkil etmoqda.
Davlat xizmatlari agentligi 15-iyul kuni Navoiy viloyatidagi 61 yoshli xodimi Adhamjon Dehqonov, Madaniyat vazirligi esa 18-iyul kuni 32 yoshli xodimi Akmal Irisov koronavirus asoratlaridan vafot etgani, Olmaliq shahri hokimligi 9 va 15-iyul kunlari shahar shifoxonalarida vafot etgan ikki ayolda koronavirus tasdiqlangani haqida xabar bergan.
Shuningdek, 22-iyulda Bosh prokurorning sobiq o‘rinbosari, Qoraqalpog‘iston prokuraturasida bo‘lim boshlig‘i bo‘lib ishlayotgan 66 yoshli Hakimbay Xalimov, Chilonzor tumani Sanitariya-epidemiologik osoyishtalik markazi bakteriologiya laboratoriyasi mudiri 62 yoshli Marhabo Ahmedova koronavirus asoratlaridan vafot etgani xabar qilingan. Biroq ushbu olti holat haqida SSV tomonidan ayni vaqtgacha axborot berilmagan.
Bundan tashqari, taniqli rejissor Sarvar Karimov ham 17-iyul kuni otasi koronavirus infeksiyasidan vafot etgani, ammo unga tashxis qo‘yilmaganini ma’lum qilgandi. Rejissorning o‘zi va uning boshqa oila a’zolarida koronavirus tasdiqlangan.
26-iyul kuni bosh vazir o‘rinbosari Aziz Abduhakimov 24-iyul kuni Samarqanddagi Ipak yo‘li xalqaro turizm universitetining 33 yoshli magistranti O‘tkir Temirov kasallikdan vafot etganini aytgan. Ma’lum bo‘lishicha, marhum o‘zida COVID-19’ning barcha belgilari bo‘lsa-da, test ham topshira olmagan, kasalxonaga ham yota olmagan.
Izoh (0)