O‘zbekiston adliya vazirining Ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi Shahnoza Soatova Telegram’dagi kanalida tanishlari va qarindoshlari orasida COVID-19 alomatlariga ega bemorlar kasallikdan vafot etgani, ammo ular rasmiy statistikaga kiritilmaganini tanqid qildi.
Oxirgi uch kunda qarindosh-u tanishlardan to‘rt kishi vafot etdi. Umrimda bunaqa kichik fursatda ko‘p o‘lik xabarini eshitmagandim. Ularning birontasiga COVID-19 tashxisi qo‘yilmadi, hatto ulardan test ham olinmadi. Lekin o‘lim oldidan barchasining bir hafta, o‘n kun isitmasi chiqdi, behol bo‘ldi, COVID-19’ning u yoki bu simptomlari kuzatildi.Eslatib o‘tamiz, Shahnoza Soatova 11-iyulda o‘zida koronavirus belgilari kuzatilayotgan bo‘lsa-da, test topshira olmayotganini ma’lum qilgan. 17-iyulda pnevmoniyadan qanday davolanayotganini aytib bergandi. 20-iyulda Shahnoza Soatova koronavirusga qarshi kurashayotgan tibbiyot xodimlariga minnatdorlik izhor etgan.Bu tizimli hodisalar xulosasi nima? Odamlar nega, nima sababdan bunday ko‘p o‘lyapti? Nega bunaqa tez (10-12 kun ichida) o‘lyapti? COVID-19 bo‘lmasa, nima bu? Nega COVID-19 tashxisi faqat test natijalariga qarab qo‘yilyapti? COVID-19’dan 100 ta odam o‘ldi degan nima-yu, 1000 ta o‘ldi degan nima?
Qo‘shnilarga o‘xshab COVID-19 va noma’lum pnevmoniya statistikasini birlashtirib, bundan keyingi strategiyani shunga qarab qurgan ma’qul emasmi? Vahimasiz karantindan adekvat karantin bosqichiga o‘tish davri keldi, chunki endi ma’lumotsizlik va ishonchsizlik ortidan vahima kelib chiqadi.
Odamlar karantinga rioya etib, uyda o‘tirishini, karantin cheklovlarini to‘g‘ri qabul qilishini istasak, asl ahvolni ko‘rsatish, o‘limlar COVID-19’danmi yo boshqa narsadanmi, qat’i nazar, aniq va ochiq aytish kerak.
Kayfiyat juda tushib ketdi!
Shahnoza Soatova, adliya vazirining maslahatchisi
Izoh (0)