Moskva shahrida yashovchi Aleksandr Andriyanov “VKontakte” ijtimoiy tarmog‘idagi sahifasida “Migrants lives matter” (Muhojirlarning hayoti muhim) harakati tashkil etilganini e’lon qildi, deb xabar beradi “MK.ru” nashri.
O‘zining ijtimoiy tarmoqdagi postida, huquq himoyachisi Rossiyaning aksariyat aholisi yaqin atrofda yashaydigan odamlar haqida o‘ylamasligidan shikoyat qildi. Shu bilan birga, uning fikriga ko‘ra, mamlakatda muhojirlarga ikkinchi toifadagi odamlardek munosabatda bo‘lishadi. Ko‘p hollarda muhojirlar tahqirlanadi, doimiy tekshiruvlar bilan qiynoqqa solinadi va ishlab topgan pullari to‘lanmaydi.
Andriyanovning so‘zlariga ko‘ra, ko‘chani tozalaydigan, oziq-ovqat yetkazib beradigan va uy quradigan odamlar antisanitar sharoitda va iflos joylarda yashashga majbur.
“Tushunish vaqti keldi. Odamlarni ruslarga, o‘zbeklarga, amerikaliklarga, yaponlarga ajratishning hojati yo‘q. Ularning bari Yer sayyorasida yashaydi. Barchaga teng huquqlar va imkoniyatlar berilishi kerak”, – deb o‘z fikrini bildirdi muallif.
Bunga misol sifatida Andriyanov tarmoqqa tegishli videoni joylashtirdi. Videoda u harakat nomi yozilgan futbolkada to‘q sariq ish kiyimidagi odamning oldida tiz cho‘kkan holda turgan va oyoq kiyimlarini yuvgan.
Postga qoldirilgan izohlarda tarmoq foydalanuvchilari faolning tashabbusini qo‘llab-quvvatlamagan. Shuningdek, izohlarda AQShga qul qilib olib kelingan qora tanlilardan farqli o‘laroq, muhojirlar Rossiyaga pul ishlash uchun o‘z xohishlari bilan kelgani ta’kidlangan.
Izoh (0)