Москва шаҳрида яшовчи Александр Андриянов «ВКонтакте» ижтимоий тармоғидаги саҳифасида «Migrants lives matter» (Муҳожирларнинг ҳаёти муҳим) ҳаракати ташкил этилганини эълон қилди, деб хабар беради «MK.ru» нашри.
Ўзининг ижтимоий тармоқдаги постида, ҳуқуқ ҳимоячиси Россиянинг аксарият аҳолиси яқин атрофда яшайдиган одамлар ҳақида ўйламаслигидан шикоят қилди. Шу билан бирга, унинг фикрига кўра, мамлакатда муҳожирларга иккинчи тоифадаги одамлардек муносабатда бўлишади. Кўп ҳолларда муҳожирлар таҳқирланади, доимий текширувлар билан қийноққа солинади ва ишлаб топган пуллари тўланмайди.
Андрияновнинг сўзларига кўра, кўчани тозалайдиган, озиқ-овқат етказиб берадиган ва уй қурадиган одамлар антисанитар шароитда ва ифлос жойларда яшашга мажбур.
«Тушуниш вақти келди. Одамларни русларга, ўзбекларга, америкаликларга, японларга ажратишнинг ҳожати йўқ. Уларнинг бари Ер сайёрасида яшайди. Барчага тенг ҳуқуқлар ва имкониятлар берилиши керак», – деб ўз фикрини билдирди муаллиф.
Бунга мисол сифатида Андриянов тармоққа тегишли видеони жойлаштирди. Видеода у ҳаракат номи ёзилган футболкада тўқ сариқ иш кийимидаги одамнинг олдида тиз чўккан ҳолда турган ва оёқ кийимларини ювган.
Постга қолдирилган изоҳларда тармоқ фойдаланувчилари фаолнинг ташаббусини қўллаб-қувватламаган. Шунингдек, изоҳларда АҚШга қул қилиб олиб келинган қора танлилардан фарқли ўлароқ, муҳожирлар Россияга пул ишлаш учун ўз хоҳишлари билан келгани таъкидланган.
Изоҳ (0)