Turkmaniston fuqarolari ichak infeksiyasining oldini olish uchun qo‘llarini yuvish va niqob taqishga chaqirildi, deb xabar bermoqda Asia-Plus. Bu haqda mamlakat hukumatining “Neytralniy Turkmenistan” gazetasining 23-sonida qayd etildi.
Maqola boshida muallif, Ona va bola salomatligi ilmiy-klinik markazi direktori o‘rinbosari vazifasini bajaruvchi Guloram Jo‘rayeva “bakterial va virusli tabiatdagi turli xil mikroorganizmlar” xavfidan ogohlantirgan.
Qo‘llarni yuvishdan tashqari, u ovqat tayyorlash va ovqatlanishning ko‘plab boshqa sanitariya-gigiyenik qoidalarini — sabzavot va mevalarni yuvish, oshxonani toza saqlash va mahsulotlarni to‘g‘ri saqlashni sanab o‘tgan.
Shundan so‘ng u oziq-ovqat nafaqat mikroorganizmlar, balki nitratlar, og‘ir metallar va pestitsidlar bilan ham zararlangan bo‘lishi mumkinligidan ogohlantirgan. Oxirda esa kutilmaganda o‘quvchilarni tibbiy niqoblar taqishga va masofa saqlashga chaqirgan, lekin buning ichak infeksiyalari bilan qanday bog‘liqligi borligini tushuntirmagan.
Eslatib o‘tamiz, Turkmanistonda 13-iyuldan boshlab niqob taqish majburiy qilib belgilangan, ammo hukumat mamlakatda koronavirus borligini hali ham rad etib kelmoqda. Niqob taqish mamlakatda janubi-sharq, shimoli-sharq va shimoldan kirib kelgan chang miqdori oshib ketgani sababli undan himoyalanish uchun majburiy deb belgilangan. Shundan so‘ng tibbiy niqoblarga talab ortdi, ularning narxi hafta davomida 14 baravarga oshdi.
Mamlakatda 6-iyuldan 15-iyulgacha Jahon sog‘liqni saqlash tashkiloti missiyasi tekshiruv o‘tkazdi. Tashrif yakunlariga bag‘ishlangan brifingda missiya rahbari Ketrin Smolvud mamlakat Sog‘liqni saqlash vazirligiga tayangan holda Turkmanistonda COVID-19 infeksiyasiga chalinish holati borligini tasdiqlamagan.
Izoh (0)