AQShdagi hayvonot bog‘idan qizil panda qochib ketdi. U ikkita emizikli bolasini tashlab ketgan

Ogayoning Kolumbus shahridagi hayvonot bog‘i 21-iyul kuni kechqurun yo‘qolib qolgan qizil pandani qidirmoqda, deb xabar beradi Fox News.

Shuningdek, mutaxassislar kameralardagi yozuvlarni ham ko‘rib chiqqan, ammo bu ham uning izini topishga yordam bermagan.

Yo‘qolgan pandaning ikkita emizikli bolasi bo‘lgan, hozirda ular maxsus sut bilan oziqlantirilmoqda. Xodimlar ona panda qaytishiga umid qilmoqda.

Hayvonot bog‘idagilarning ta’kidlashicha, qizil panda odamlarga hech qanday xavf tug‘dirmaydi, biroq baribir unga duch kelinganida yaqinlashmaslik va hayvonot bog‘iga xabar berish so‘ralgan.

“Ular tabiatan uyatchan va tutqich bermas, shu sababli uni qo‘rqitib yuborishni istamaymiz”, — deyiladi hayvonot bog‘i e’lonida.

Eslatib o‘tamiz, 2019-yilda Belfast hayvonot bog‘idan ham noyob qizil panda qochib ketgan edi.