Eron AQShning F-15 qiruvchi samolyoti Suriya osmonida parvoz qilgan Mahan Air aviakompaniyasiga tegishli yo‘lovchi samolyotga yaqinlashib, uning yo‘nalishini o‘zgartirishga majbur qilgani uchun javob choralari ko‘rilishini va’da qildi. Bu haqda Meduza xabar berdi.
“Eron o‘z fuqarolariga qarshi xatti-harakatlarni javobsiz qoldirmaydi va vaqt kelganda mantiqsiz xatti-harakatlarga keskin va munosib javob beradi”, — deya ma’lum qilgan Eron Tashqi ishlar vazirligi. Biroq vazirlik aynan qanday choralar ko‘rilishini ma’lum qilmagan.
Eslatib o‘tamiz, 23-iyul kuni kechasi AQShning F-15 qiruvchi samolyoti Tehron—Bayrut yo‘nalishi bo‘yicha uchayotgan Mahan Air aviakompaniyasiga tegishli yo‘lovchi samolyotiga yaqinlashgan. To‘qnashuvdan qochish maqsadida yo‘lovchi samolyoti zudlik bilan balandlikni o‘zgartirgan. Tezkor amalga oshirilgan manyovrlar sabab bir necha yo‘lovchiga jarohat yetgan. Natijada samolyot Bayrutga qo‘ngan.
AQSh Qurolli kuchlari markaziy qo‘mondonligi F-15 qiruvchi samolyoti Suriya uzra parvoz qilgan Mahan Air aviakompaniyasiga tegishli yo‘lovchi samolyotga xavfsiz masofada — 1000 metr uzoqlikda yaqinlashganini ma’lum qilgan.
Eron TIV maxsus vakili Abbos Musaviy ushbu ko‘ngilsiz hodisaga izoh berar ekan, Eron samolyoti bilan biror narsa sodir bo‘lsa, bunga AQSh javobgar bo‘lishini ma’lum qilgan. Musaviyning so‘zlariga ko‘ra, Eronning BMTdagi doimiy vakili sodir bo‘lgan voqeadan so‘ng BMT bosh kotibi Antoniu Gutterish bilan uchrashgan.
Izoh (0)