Mahalla va oilani qo‘llab-quvvatlash vazirligi tomonidan aholiga ijtimoiy ko‘mak berish maqsadida olib borilayotgan xayriya tadbirlari davomida naqd pul orqali xayriya qilinish holatlari kuzatilmayapti. Bu haqda 23-iyul kuni AOKAda o‘tkazilgan brifingda ma’lum qilindi, deya xabar bermoqda “Daryo” muxbiri.
Tadbirda vazirlik axborot xizmati rahbari Saodat Boymirzayeva faoliyati qayta yo‘lga qo‘yilgan xayriya markazlarida aholiga tarqatilgan dori-darmon va oziq-ovqat mahsulotlari xarajati to‘g‘risida so‘z yuritdi.
“Joriy yilning 14-iyulidan boshlab, vazirlik hamda Yoshlar ishlari agentligi bilan birgalikda homiylik, xayriyalarni muvofiqlashtirish va volontyorlik markazlari tashkil etildi. Markazlarning asosiy vazifasi, homiy tashkilot va fuqarolar tomonidan xayriya qilingan oziq-ovqat va dori-darmon mahsulotlarini ehtiyojmand hamda karantin qoidalarining kuchaytirilishi munosabati bilan doimiy daromadsiz qolgan fuqarolarga yetkazib berishdan iborat.
Aholi murojaatlari hamda fuqarolar yig‘inlari tomonidan shakllantirilgan ro‘yxatlar asosida, 2020-yilning 14-iyulidan 22-iyuligacha, ya’ni bir hafta davomida respublika miqyosida jami 145 ming 154 ta moddiy daromad manbasini yo‘qotgan, ishsiz va ehtiyojmand oilalarga 14 milliard 67 million so‘mlik oziq-ovqat mahsulotlari yetkazildi. Bundan tashqari, 330 ta oilaga qiymati 52 million 400 ming so‘m miqdordagi dori-darmonlar ham tarqatildi”, — dedi Boymirzayeva.
Izoh (0)