Davlat soliq qo‘mitasi 22-iyul, chorshanba kuni savdo cheklari asosida o‘tkaziladigan yutuqli o‘yinning birinchi tirajini o‘tkazdi. O‘yinda Toshkent shahrida onlayn nazorat kassalari va virtual kassalar orqali ro‘yxatdan o‘tgan 9947 ta chek ishtirok etdi. Bu haqda qo‘mita matbuot xizmati xabar berdi.
Turli yutuqlar qo‘yilgan o‘yinda Chevrolet Nexia-3 avtomobili sohibi aniqlandi. Shuningdek, to‘rtta velosiped va turli maishiy texnikalar ham o‘z egalarini topdi. O‘yin MY5 telekanalida jonli efirda o‘tkazildi.
O‘yinda sovrindor bo‘lgan har bir g‘olibga bir kun ichida tashkilotchilar tomonidan SMS xabar jo‘natiladi va unda yutuqni qayerda va qachon olish mumkinligi ko‘rsatiladi.
Qo‘mita tomonidan ma’lum qilinishicha, 22-iyul kuni ro‘yxatdan o‘tkazilgan cheklar o‘yinning ikkinchi tirajida ishtirok etadi.
Eslatib o‘tamiz, O‘zbekistonda tadbirkorlik subyektlari va savdo shoxobchalarida onlayn-nazorat kassalari va virtual kassalar joriy qilinmoqda. Aholining xaridlar uchun chek talab qilishi va mazkur kassalardan foydalanishni ko‘paytirish maqsadida savdo cheklari asosida o‘tkaziladigan chek lotereyasi joriy qilindi. Mazkur chekli o‘yin iyul oyidan boshlandi.
Izoh (0)