Navoiy viloyati hokimi Qobul Tursunov ijtimoiy tarmoq orqali aholidan koronavirus bo‘yicha kelib tushayotgan barcha savollarga shaxsan o‘zi javob yozmoqda. Bu haqda “Daryo”ga viloyat hokimi axborot xizmati rahbari Dilshod Mamarajabov ma’lum qildi.
Ta’kidlanishicha, Navoiy hokimi Qobul Tursunov bu haqda viloyat aholisiga qilgan murojaatida aytib o‘tgan.
Murojaatda qayd etilishicha, viloyatda 65 turdagi dori-darmonning uch oylik zaxirasi yaratilgan. Shuningdek, 2,1 milliard so‘mlik tibbiy buyumlar xarid qilingan.
“Sog‘liqni saqlash vazirligi hamda ‘Farmsanoat’ agentligiga buyurtma berish orqali 7,6 milliard so‘mlik tibbiyot vositalari xarid qilindi. Viloyat sog‘liqni saqlash boshqarmasi hamda barcha shahar va tumanlarda maslahat markazi hamda ishonch telefonlari tashkil etildi. Ishonch raqamlari orqali nafaqat salomatlikka oid, balki ijtimoiy yordam so‘rab murojaat qilayotganlar muammosi ham o‘rganilmoqda. Homiylik yordamini tarqatish uchun 64 nafar volontyor va 17 ta avtomashina jalb qilingan. Uy karantinidagilarga xizmat ko‘rsatish uchun esa 354 nafar shifokor va 1454 nafar patronaj hamshira jalb qilingan”, — dedi Navoiy viloyati rahbari o‘z murojaatida.
Ma’lumotga ko‘ra, ayni kunda Navoiyda COVID-19 bilan kasallanganlar 372 nafar kishi bo‘lib, shundan davolanganlar soni 322 nafarni tashkil qiladi. Tibbiyot muassasalarida 47 nafar bemor bo‘lib, 18 nafari statsionar, 29 nafari ambulator tartibda davolanmoqda. Bemorlarning 45 nafari qoniqarli, 2 nafari og‘ir ahvolda.
“O‘ta og‘ir ahvoldagi bemorlarimiz yo‘q. Shunga qaramasdan, yana qo‘shimcha ravishda 238 ta o‘rin hozirlandi. Ayni paytgacha esa jami 1614 ta o‘rin yaratilgan. Viloyatda 44 ta mobil guruhning faoliyat yuritayotganini inobatga olib, tibbiyot muassasalari transportlaridan tashqari, qo‘shimcha 50 ta Damas ajratishni mo‘ljal qilyapmiz”, — dedi viloyat rahbari.
Qobul Tursunov ijtimoiy tarmoqlarda Navoiy viloyati Sanitariya-epidemiologiya osoyishtalik markazi xodimlarining faoliyatidan norozilik aks etgan postlar e’lon qilinganini ta’kidlar ekan, ayni shu sabab ijtimoiy tarmoqlar orqali hokimlikka yuborilgan barcha murojaatlarga shaxsan o‘zi javob berishga harakat qilayotganini ta’kidladi.
“Navoiy viloyat hokimligining ijtimoiy tarmoqdagi manziliga kelgan ko‘plab savollarga shaxsan o‘zim javob yozyapman. Ammo bir haqiqatni tan olishimiz kerak, bugun tibbiyot sohasida mutaxassislar yetishmaydi. Shunga qaramasdan, bor kuch va imkoniyatni ishga solyapmiz”, — dedi Navoiy viloyati hokimi.
Izoh (0)