Toshkent shahrida koronavirusga chalingan 52 yoshli erkak vafot etdi. Bu haqda Sog‘liqni saqlash vazirligi xabar berdi.
Xabarga ko‘ra, Toshkent shahri Mirobod tumanida yashagan 52 yoshli A.X. Rossiyada chap o‘pka yuqori bo‘lagi o‘smasini davolash va kimyoterapiya muolajalaridan so‘ng 5-iyun kuni O‘zbekistonga qaytgan.
Bemorda holsizlik, ko‘krak qafasida og‘riqlar kuzatilgan va u 15-iyun kuni Yakkasaroy tumani tibbiyot birlashmasi statsionariga yotqizilgan.
Unda 27-iyun kuni COVID-19 infeksiyasi borligi tasdiqlangan va bemor Epidemiologiya, mikrobiologiya va yuqumli kasalliklar ilmiy-tekshirish instituti klinikasiga o‘tkazilgan.
A.X.ga COVID-19 infeksiyasining og‘ir kechishi, ikki tomonlama pnevmoniya tashxisi qo‘yilgan. Xastalik sepsis, o‘tkir nafas yetishmovchiligining 2-darajasi kabi asoratlar bilan kechgan. Shuningdek, bemor o‘pka saratoni, gipertoniya hamroh kasalliklari bilan ham og‘rigan.
Bemorga mutaxassislar tomonidan onlayn konsultatsiya va konsiliumlar o‘tkazilgan, davolash jarayoni belgilangan standartlar asosida olib borilgan.
Biroq shifokorlar tomonidan standartlar asosida o‘tkazilgan reanimatsion muolajalarga qaramay, A.X.ning ahvoli keskin og‘irlashgan. U o‘tkir nafas va yurak-qon tomir yetishmovchiligidan vafot etgan, deyiladi SSV xabarida.
Bu “Daryo” hisobi bo‘yicha 20-iyul soat 23:20 holatiga ko‘ra O‘zbekistondagi 95-o‘lim holati. Sog‘liqni saqlash vazirligi taqdim etib kelayotgan statistika bo‘yicha esa mamlakatda epidemiya boshlaganidan buyon 91 kishi vafot etgan.
Qolgan holatlar, jumladan, Davlat xizmatlari agentligi (bitta holat), Madaniyat vazirligi (bitta holat) va Olmaliq shahri rasmiylari (ikkita holat) tomonidan ma’lum qilingan (ular hozircha SSV tomonidan tasdiqlanmagan).
Izoh (0)