Farg‘ona viloyatida koronavirusga chalinganlar bilan muloqotda bo‘lib, karantinga olinayotgan kishilar soni o‘sib borayotgani tufayli 9600 ta zaxira o‘rni tayyorlab qo‘yilishi ma’lum qilindi. Bu haqda viloyat hokimligi axborot xizmati xabar qilgan.
“Koronavirusga chalinganlar O‘zbekistonda ham tobora ko‘payib bormoqda. To‘g‘ri, Farg‘ona viloyatining bu boradagi ko‘rsatkichlari nisbatan odamda xotirjamlik tug‘dirishi mumkin. Lekin aslida unday emas. 20-iyul kuni kechga tomon jami kasallanganlar 194, undan tuzalib chiqqanlar 174 nafar bo‘lib, hozirda davolanayotganlar 19 nafarni tashkil etadi. Bir kishi vafot etgan. Og‘ir yoki o‘ta og‘ir bemorlar yo‘q. Ammo kasallanganlar bilan muloqotda bo‘lganlar, ular esa oz emas, karantinda saqlanmoqda”, — deyiladi hokimlik xabarida.
“Biz eng og‘ir holatlarga ham tayyor bo‘lishimiz lozim. Buning uchun zudlik bilan 9600 ta zaxira o‘rin-joy tayyorlashimiz zarur”, — degan Farg‘ona viloyati hokimi.
Xabarda qayd etilishicha, viloyat hokimi Shuhrat G‘aniyev Beshariq, Oltiariq, Farg‘ona tumanlaridagi “Ona va bola”, “Bog‘ishamol”, “Zilol”, “Chimyon”, “Temiryo‘lchi”, “Nurafshon”, “Qiziltepa”, “Jahongirmirzo” kabi davlat va xususiy sihatgohlarni aylangan. Sanatoriylarning egalari bilan muzokaralar olib borilgan. Sihatgohlar karantin tufayli dam oluvchilarni qabul qilmayapti.
“Biz viloyatimiz uchun maxsus dastur-reja ishlab chiqdik. Bu sihatgohlarda tibbiyot talablariga mos, ya’ni bir kishilik va albatta, sanitariya qulayliklari ichkarida bo‘lgan xonalarni zaxiraga olish uchun o‘zaro shartnoma tuzyapmiz. Bunda hokimlik har bir zaxira o‘rni uchun 3 million so‘m sihatgohga to‘lab beradi. Sihatgoh esa agarda zarurat tug‘ilsa, koronavirusga qarshi kurash viloyat shtabi yuborgan bemorlarga shu xonalarni taqdim etadi. Ularni davolash yoki chegaralash bilan bog‘liq masalalarni sog‘liqni saqlash tizimi hal etadi. Shunday qilinsa, ham zaxira joy hozirlanadi, ham vaqtincha ishlamay turgan sihatgohlar ishchi-xizmatchilari ijtimoiy himoyaga olingan bo‘ladi. Ya’ni har bir joy uchun hokimlik to‘laydigan mablag‘ hisobidan ish haqi olib turadi”, — deydi Shuhrat G‘aniyev.
Hokimlikning Telegram’dagi kanaliga yuklangan videoda Shuhrat G‘aniyevning zaxiraga tayyorlanayotgan har bir muassasani shaxsan o‘zi tegishli mutaxassislar bilan birga o‘rganib chiqayotgani, u yerda koykalar uchun, joy uchun hokimlik hisobidan ajratiladigan pullar haqida gapirayotgani aks etgan.
Avvalroq Farg‘ona viloyatiga Janubiy Koreyadan olib kelingan 4000 ta ekspress-testlardan chegara o‘tkazish maskanlari, davlat organlari va korxonalarda foydalanish boshlangani haqida xabar qilingandi.
Izoh (0)