O‘zbekistonda qishloq joylarda infratuzilmani rivojlantirishga 30 mln dollar ajratiladi

Vazirlar Mahkamasi “Kuvayt arab iqtisodiy taraqqiyot jamg‘armasi ishtirokida ‘Namunaviy loyihalar bo‘yicha yakka tartibdagi uy-joylar qurilishi yuzasidan qishloq massivlarida muhandislik infratuzilmasini rivojlantirish (2 bosqich)’ loyihasini amalga oshirish chora-tadbirlari to‘g‘risida”gi 427-sonli qarorini qabul qildi.

2019-yil 27-noyabrda yuqorida qayd etilgan loyihani amalga oshirish uchun to‘rt yillik imtiyozli davrni qo‘shib hisoblaganda 24 yilda so‘ndirish muddati bilan 30 million dollar miqdoridagi qarz bitimi imzolangan.

Qaror bilan Qoraqalpog‘iston Respublikasi, Qashqadaryo, Samarqand, Surxondaryo, Toshkent va Farg‘ona viloyatlarida “Namunaviy loyihalar bo‘yicha yakka tartibdagi uy-joylar qurilishi yuzasidan qishloq massivlarida muhandislik infratuzilmasini rivojlantirish (2-bosqich)” loyihasini amalga oshirish doirasida 2020—2021-yillarda tashqi muhandislik tarmoqlari va transport kommunikatsiyalarini qurish bo‘yicha yig‘ma ko‘rsatkichlar tasdiqlanadi.

“Qishloq qurilish invest IK” MChJ loyihaning umumiy amalga oshirilishi va Kuvayt arab iqtisodiy taraqqiyot jamg‘armasi qarz mablag‘laridan maqsadli foydalanilishi uchun javobgar bo‘lgan ijro etuvchi organ etib belgilandi. “Qishloq qurilish invest IK” MChJning loyihani amalga oshirish doirasida loyiha-qidiruv ishlanmalarini moliyalashtirish hamda boshqa xarajatlari Prezidentning 2020-yilda 10-yanvardagi PQ-4565-son qaroriga muvofiq “Qishloq qurilish invest IK” MChJ uchun nazarda tutilgan markazlashtirilgan kapital qo‘yilmalar limitlari hisobidan qoplanadi.

Hujjat bilan ilovaga muvofiq qarz mablag‘lari yuzasidan asosiy qarzni, foizlar hamda boshqa to‘lovlarni so‘ndirishning reja jadvali tasdiqlandi. Loyiha bo‘yicha mazkur xarajatlar O‘zbekiston Respublikasi Davlat budjeti mablag‘lari hisobidan amalga oshiriladi.

Hujjat 2020-yil 8-iyul kuni kuchga kirgan.