Ўзбекистонда қишлоқ жойларда инфратузилмани ривожлантиришга 30 млн доллар ажратилади

Вазирлар Маҳкамаси «Кувайт араб иқтисодий тараққиёт жамғармаси иштирокида ‘Намунавий лойиҳалар бўйича якка тартибдаги уй-жойлар қурилиши юзасидан қишлоқ массивларида муҳандислик инфратузилмасини ривожлантириш (2 босқич)’ лойиҳасини амалга ошириш чора-тадбирлари тўғрисида»ги 427-сонли қарорини қабул қилди.

2019 йил 27 ноябрда юқорида қайд этилган лойиҳани амалга ошириш учун тўрт йиллик имтиёзли даврни қўшиб ҳисоблаганда 24 йилда сўндириш муддати билан 30 миллион доллар миқдоридаги қарз битими имзоланган.

Қарор билан Қорақалпоғистон Республикаси, Қашқадарё, Самарқанд, Сурхондарё, Тошкент ва Фарғона вилоятларида «Намунавий лойиҳалар бўйича якка тартибдаги уй-жойлар қурилиши юзасидан қишлоқ массивларида муҳандислик инфратузилмасини ривожлантириш (2-босқич)» лойиҳасини амалга ошириш доирасида 2020—2021 йилларда ташқи муҳандислик тармоқлари ва транспорт коммуникацияларини қуриш бўйича йиғма кўрсаткичлар тасдиқланади.

«Қишлоқ қурилиш инвест ИК» МЧЖ лойиҳанинг умумий амалга оширилиши ва Кувайт араб иқтисодий тараққиёт жамғармаси қарз маблағларидан мақсадли фойдаланилиши учун жавобгар бўлган ижро этувчи орган этиб белгиланди. «Қишлоқ қурилиш инвест ИК» МЧЖнинг лойиҳани амалга ошириш доирасида лойиҳа-қидирув ишланмаларини молиялаштириш ҳамда бошқа харажатлари Президентнинг 2020 йилда 10 январдаги ПҚ-4565-сон қарорига мувофиқ «Қишлоқ қурилиш инвест ИК» МЧЖ учун назарда тутилган марказлаштирилган капитал қўйилмалар лимитлари ҳисобидан қопланади.

Ҳужжат билан иловага мувофиқ қарз маблағлари юзасидан асосий қарзни, фоизлар ҳамда бошқа тўловларни сўндиришнинг режа жадвали тасдиқланди. Лойиҳа бўйича мазкур харажатлар Ўзбекистон Республикаси Давлат бюджети маблағлари ҳисобидан амалга оширилади.

Ҳужжат 2020 йил 8 июль куни кучга кирган.