Vengriya O‘zbekistonda universitet va bank filiallari ochadi, yadro sohasida hamkorlik qiladi

Toshkentga 16-iyul kuni Vengriya tashqi ishlar va tashqi savdo vaziri Peter Siyyarto tashrif buyurib, tashqi ishlar vaziri Abdulaziz Komilov, bosh vazirning o‘rinbosari, tashqi savdo va investitsiyalar vaziri Sardor Umurzoqov, energetika vaziri Alisher Sultonov va O‘zbekiston hukumatining boshqa a’zolari bilan uchrashdi.

Vengriya tashqi ishlar va tashqi savdo vazirining O‘zbekistonga tashrifi davomida yadro sohasidagi hamkorlik, OTP banki va Debresen universiteti filiallari ochilishi, “O‘zbekiston-Vengriya-YeI” formatidagi hamkorlik masalalari muhokama qilindi.

Energetika vazirligidagi muzokaralar davomida Vengriya tomoni energetika sohasida hamkorlik qilishga tayyorligini, xususan, Energetika vazirligi qoshidagi “O‘zatom” agentligi, Fanlar akademiyasi va Vengriya yadroviy energiya ilmiy markazi MVM Paksi Atomeromu Ltd. atom elektr stansiyasini qurish va yadro energetikasi sohasida ilmiy almashinuv sohasidagi hamkorlikka tayyor ekanligi ma’lum qilindi.

Shuningdek, yirik issiqlik elektr stansiyalarida, shu jumladan, Vengriya ENIOX kompaniyasi tomonidan ishlatiladigan atom elektr stansiyalarida aylanma suvni sovitishning “quruq” usulidan foydalanish imkoniyatlari muhokama qilindi. Vengriya tomoni Vengriyaning ENIOX kompaniyasi ushbu loyihada ishtirok etgan taqdirda Vengriya eksport-import banki tomonidan 130 million yevroga teng qiymatda moliyalashga tayyor ekanligini ma’lum qildi.

Investitsiyalar va tashqi savdo vazirligida bo‘lib o‘tgan yig‘ilishda O‘zbekistonda venger OTP bankini ochish istiqbollari, shuningdek, Vengriya Eksimbanki mablag‘lari jalb qilingan holda qo‘shma loyihalarni amalga oshirish imkoniyatlari muhokama qilindi.

Tashqi ishlar vazirligida bo‘lib o‘tgan uchrashuvda O‘zbekiston Yevropa Ittifoqining Markaziy Osiyo bo‘yicha Strategiyasini ilgari surish doirasida “O‘zbekiston-Vengriya-YeI” formatidagi hamkorlikni kengaytirishga tayyorligi ta’kidlandi.

Noyabr oyida Iqtisodiy hamkorlik bo‘yicha O‘zbekiston-Vengriya hukumatlararo komissiyasining oltinchi yig‘ilishi va ikki mamlakat biznes-forumi o‘tkazilishi rejalashtirilgan.

Bundan tashqari, Vengriya o‘zbekistonlik talabalar uchun kvotani 30 nafardan 100 kishigacha oshirishni rejalashtirmoqda, uning doirasida Budapesht politexnika universitetida atom energiyasini o‘rganish dasturini joriy etish taklif qilinmoqda.

“O‘zbekiston 24” telekanalining xabar berishicha, O‘zbekistonda Debresen universitetining filialini ochish rejalashtirilgan.