Qoraqalpog‘istonda ekinlari suvsiz qolgani uchun Nukus—Toshkent yo‘lini to‘sib qo‘ygan aholiga suv berildi

Qoraqalpog‘iston Respublikasi Beruniy tumanida bir guruh fuqarolar suv tanqisligidan norozi bo‘lib, Nukus—Toshkent magistral yo‘lini to‘sib qo‘ygani haqida xabar berilgandi. Tuman hokimligining xabar berishicha, mazkur norozilikka sabab bo‘lgan suv muammosi hal qilingan.

Ma’lum qilinishicha, Beruniy tumani hokimi zudlik bilan voqea joyiga yetib borgan va muammo bartaraf etilgan, aholi tomorqalariga suv berish maqsadida suv nasoslari ishga tushirilgan. Huquq-tartibot idoralari yig‘ilgan aholini tarqatgan.

Ta’kidlanishicha, mazkur holat Beruniy tumani “Abay” ovul fuqarolar yig‘inidagi Quralpa aholi punktida sodir bo‘lgan. 10 kun davomida Nayman kanaliga suv kelmagani sababli hudud aholisi yo‘lni to‘sib, norozilik bildirgan.

Ma’lum qilinishicha, tumanda 13 ta mahalla mavjud bo‘lib, ularning barchasiga bir vaqtning o‘zida suv yetkazib berish qiyin hisoblanadi. Shu sababli mahallalardagi ekin maydonlarini navbatma-navbat sug‘orish yo‘lga qo‘yilgan.

Eslatib o‘tamiz, 2019-yilning noyabrida Nukusda odamlar hududni tabiiy gaz bilan ta’minlab berishni talab qilib, norozilik namoyishi o‘tkazgan edi.