Андижон ҳокими вилоятдаги барча тиббиёт муассасалари 24 соатлик иш тартибига ўтганини маълум қилди

Андижон вилояти ҳокими Шуҳрат Абдураҳмонов коронавирусга чалинган фуқаролардан биринчи зарбани қабул қиладиган инсонлар тез тиббий ёрдам шифокорлари эканлигини билдириб, уларга шароит яратилмаса, касаллик тарқалишининг олдини олиш янада қийинлаши мумкинлигини билдирди. Бу ҳақда ҳоким 20 июль, душанба куни журналистлар иштирокида ўтказилган брифингда маълум қилди, дея хабар берди «Дарё» мухбири.

Вилоят раҳбари тиббиёт ходимларининг меҳнатини эътироф этар экан, Андижондаги барча тиббиёт муассасалари 24 соатлик иш тартибига ўтказилганини маълум қилди. Шунингдек, уларнинг меҳнатини рағбатлантириш, зарур техника, алоқа воситалари, жиҳозлар билан таъминлаш бўйича доимий чоралар кўрилаётганлигини билдирди.

«Аҳолига ўтган сафар қилган мурожаатимиздан сўнг шифокорлар кўрсатилаётган тиббий хизмат сифатини ошириш учун жойлардаги бўлинмаларга қўшимча тез тиббий ёрдам автомашиналари кераклигини айтиб, ёрдам сўраганди. Уларнининг талаб ва истаклари билан икки кун ичида 16 та янги тез тиббий ёрдам автомашинасини олиб келиб, топширдик. Шу куни ҳайдовчилар, ҳамширалар ва врачлар билан алоҳида суҳбатлашдим. Уларнинг ташвишлари билан қизиқдим. Қаранг, бирорта тиббиёт ходими чарчадим, шароитим чатоқ дегани йўқ. Улар ҳақиқий ватанпарварлик намунасини кўрсатиб, касаллик билан астойдил курашмоқда, Гиппократ қасамига содиқ қолмоқда. Бўлмасам, буларнинг ҳаммаси 24 соатлик иш тартибига ўтган. ‘Муаммомиз йўқ’ дейишса ҳам ушбу жонкуяр инсонларни қўшимча рағбатлантириш, мукофот пуллари бериш, моддий-техник базасини мустаҳкамлаш, озиқ-овқат таъминотини яхшилаш бўйича мутасаддиларга қатор топшириқлар бердим», — деди Шуҳрат Абдураҳмонов.

Вилоят ҳокимининг айтишича, 19 июль, якшанба куни вилоят бўйича 97 нафар фуқаро тез ёрдамга иситма билан мурожаат қилган.

«Нега айнан тез ёрдамга эътибор қаратяпмиз? Чунки ҳар қандай касал биринчи навбатда тез ёрдам шифокорларига рўпара келади. Коронавирус деганларининг асосий белгиси ҳам иситма ва томоқ оғриғи. 103 га қўнғироқ қилаётганларнинг аксарияти ҳам шу белгилар бўйича мурожаат қилади. Мисол учун 19 июль, якшанба куни вилоят бўйича 97 нафар фуқаро истима билан мурожаат қилган. У вирусга йўлиққан ёки йўлиқмаганини тест орқали билиш мумкин, холос. Агар тез ёрдамдагилар сергак ишласа, касаллик тарқалишининг олдини олган бўламиз», — деди Андижон вилояти ҳокими.