«Тошкентда йўл қўйилган хатолардан тўғри хулоса чиқариш керак». Депутат ҳудудларни иккинчи тўлқинга тайёрлаш чораларини таклиф этди

Олий Мажлис Қонунчилик палатаси депутат Дониёр Ғаниев коронавирус пандемиясининг иккинчи тўлқини мамлакат тиббиёт тизими босимга тайёр эмаслигини очиқ-ойдин кўрсатиб қўйганини маълум қилди. Депутат ўзининг Telegram’даги канали орқали Тошкент шаҳрида йўл қўйилган хатолардан тўғри хулоса чиқарган ҳолда, ҳудудларни иккинчи тўлқин босимига тайёрлаш чораларини кўришни тавсия этган.

Ўзбекистонда коронавирус пандемиясининг иккинчи тўлқини кўплаб муаммоларни келтириб чиқаргани, айниқса, Тошкент шаҳри ва Тошкент вилоятида сезилиб қолди. Тестлар етишмаслиги, касаллик аломати бор фуқароларга тез ёрдам вақтида кўрсатилмагани ёки уларни қабул қилишга шифохоналарда жой қолмаганлиги, аптекаларда дори-дармонлар танқислиги, уйда даволаниш учун зарур қўлланмалар ишлаб чиқилмагани, шифокорларнинг зарур ҳимоя воситалари ва тиббий ускуналар билан тўлиқ таъминланмаганлиги каби муаммолар тиббиёт тизимимиз иккинчи тўлқин босимига (орада 4 ой вақт бўлишига қарамай) афсус, тайёр эмаслигига ҳаммамиз гувоҳ бўлдик.

Бу ҳақда ижтимоий тармоқларда фуқаролар ва блогерлар жуда кўплаб танқидий фиклар ва мақолалар эълон қилди. Лекин ҳозир айбдорни излашдан фойда йўқ, эҳтимол коронавирусдан қутулгач, йўл қўйилган камчилик ва хатоларни парламент текшируви асосида шошмай ўрганиб, айбдор масъул шахсларга чора кўриш имкони бўлар (орзуга айб йўқ).

Аксинча, ҳозир биринчи навбатда, Тошкент шаҳрида йўл қўйилган хатолардан тўғри хулоса чиқарган ҳолда, ҳудудларни иккинчи тўлқин босимига, айниқса, грипп ва шамоллаш кучаядиган куз-қиш мавсумига тайёрлаш чораларини кўриш муҳим деб ўйлайман.

• Биринчидан, вирусга чалинган фуқароларни ётқизиш учун ҳудуддаги мавжуд санаториялар, коллеж, лицей ва мактабларнинг спорт залларида қисқа муддатларда махсус даволаниш марказларини ташкил этиш орқали минглаб янги захира ўринлар (койка) яратиш ҳамда бошқа касалликлар билан чалинган фуқароларга ёрдам кўрсатувчи шифохоналар қувватини қисқартирмасликка алоҳида эътибор қаратиш;
• Иккинчидан, тез ёрдам автомобилларига эҳтиёж кўпайишини инобатга олиб мавжуд автомобилларни тўлиқ техник кўрикдан ўтказиш, шунингдек, ҳудудларда йўналишли такси хизмати кўрсатувчи ташкилот ва фуқароларнинг Damas (ёки бошқа минивенлар) автомобилларини ижара ва волонтёрлик асосида тез ёрдам хизмати кўрсатиш учун жалб қилиш орқали захира қувват яратиш чораларини кўриш;
• Учинчидан, ҳудудларда ҳамшира ва шифокорларнинг етишмаслик ҳолатларини олдини олиш учун ҳозирда нафақада/ишламаётган малакали шифокорларни ҳамда ишсиз бўлиб турган ўрта махсус дипломига эга ҳамшираларни мавсумий ёллаш ва уларни янги ташкил этилаётган махсус карантин/даволаниш марказларига, тез тиббий ёрдам автомобилларига рўйхат асосида бириктириш;
• Тўртинчидан, ҳар бир шаҳар ва туманларда энг камида 10 тадан кислород концентраторлари, пульсоксиметр захирасини тайёрлаш;
• Бешинчидан, тест натижаларини аниқлайдиган ПЗР лабораториялар сонини ошириш ҳамда тестлар заҳирасини шакллантириш;
• Ва, албатта, карантин чораларини сақлаб қолиш ва унга қатъий амал қилинишини таминлаш.

Дониёр Ғаниев, Олий Мажлис Қонунчилик палатаси депутат

Аввалроқ Президент Шавкат Мирзиёев 20 июль куни эрта тонгдан Ўзбекистонда коронавирус инфекциясига қарши кураш борасида олиб борилаётган ишларнинг чуқур танқидий таҳлилига бағишланган видеоселектор йиғилиши ўтказгани тўғрисида хабар берилганди. Йиғилишда Президент қисқа муддатларда касалликка чалинганларни даволаш учун яратилган қўшимча ўрин-жойлар сонини ошириш лозимлиги таъкидланган.Эслатиб ўтамиз, Президент 14 июль куни ўтказилган видеоселекторда коронавирусга қарши кураш учун мамлакатда барча захира ва имкониятлар мавжудлигини таъкидлаган, бироқ ҳозирда эпидемиологик вазият жуда оғирлигини айтганди. Шунингдек, давлат раҳбари коронавирусни аниқлаш учун тест топшириш жараёнини соддалаштириш, ҳудудларда уч ойлик дори захирасини яратиш ҳамда дорихоналарда ва бозорларда нархлар ошишининг олдини олиш, зарур жойларда карантин чораларини кучайтириш бўйича топшириқ берган.