Prezident Shavkat Mirziyoyev 14-iyul, seshanba kuni o‘tkazilgan videoselektorda mamlakatdagi epidemiologik vaziyatga to‘xtalib, aholi tomonidan turli noroziliklar bildirilayotganini ta’kidladi.

Foto: Prezident matbuot xizmati

Ma’lum qilinishicha, 8-iyul kuni bo‘lib o‘tgan yig‘ilishdan keyin Rossiya va Qozog‘iston chegarasida to‘plangan O‘zbekiston fuqarolari mamlakatga olib kelingan. Eslatib o‘tamiz, o‘sha yig‘ilishda davlat rahbari shu paytga qadar xorijiy davlatlardan 90 mingdan ortiq fuqaro olib kelingani va xorijda qolgan barcha o‘zbekistonliklar olib kelinishini ma’lum qilgandi.

Prezidentning qayd etishicha, Rossiyadagi o‘zbekistonliklarni temiryo‘l orqali O‘zbekistonga olib kelish choralari ko‘rilmoqda.

Shavkat Mirziyoyevning ta’kidlashicha, 14-iyul kuni soat 14:00 ga qadar 402 kishida koronavirus aniqlangan. Biroq Sog‘liqni saqlash vazirligi 14-iyul kuni soat 10:00 holatiga ko‘ra, kasallikka chalinish bo‘yicha 281 ta, soat 17:30 holatiga ko‘ra, 121 ta yangi holat aniqlangani haqida xabar bergandi.

Ta’kidlanishicha, hududlarda karantin choralarining yumshatilishi yoki kuchaytirilishi masalasida viloyat va tuman hokimlari qaror qiladi.

“Dunyo hamjamiyati, hamma kurashyapti. Davolash nuqtayi nazaridan, vaksina topish bo‘yicha juda katta mablag‘lar sarflanmoqda. Har kuni buni nazorat qilyapmiz. Tezroq olimlar vaksina topganida edi, qayerdan, qancha bo‘lishidan qat’i nazar, xalqimizga uni yetkazib berish uchun hamma choralarni ko‘ramiz. Lekin ming afsus, bu savolga javob yo‘q hozir”, — dedi davlat rahbari.

Shavkat Mirziyoyev har bir viloyatdagi to‘rtta sektorga hududning uch oylik dori zaxirasini yaratish, dorixonalarda narxlar oshishining oldini olish bo‘yicha topshiriq berdi.

Prezidentning aytishicha, ayni paytda zaxiralar yetarli, yetmayotgan mahsulotlar olib kelinmoqda, biroq ularning joylarga yetib borishi qiyin bo‘lmoqda. Hududlarda narx-navo har xil bo‘lmoqda.

Shuningdek, davlat rahbati sektor rahbarlariga hududlardagi bozorlarda oziq-ovqat narxini nazorat qilish bo‘yicha ko‘rsatma berdi.

Bundan tashqari, hokimlarga ertalab soat 08:00 dan 09:00 gacha va kechqurun soat 21:00 dan 22:00 gacha ijtimoiy tarmoqlarda ko‘tarilgan savollarga javob berish vazifasi qo‘yildi.

“Hozir epidemiologik vaziyatimiz juda og‘ir. Agar o‘zimiz karantinga e’tibor qilib, chora-tadbirlar ko‘rmas ekanmiz, raqamlar ko‘payib ketmoqda. Meni eng bezovta qilayotgani — o‘lim ham ko‘paymoqda”, — dedi Shavkat Mirziyoyev.

Shuningdek, Shavkat Mirziyoyev mazkur yig‘ilishda koronavirusga qarshi kurash uchun mamlakatda barcha zaxira va imkoniyatlar mavjudligini aytdi. Bosh vazir o‘rinbosari Behzod Musayev, sog‘liqni saqlash vaziri Alisher Shodmonovga bir kun muddatda amaldagi test-tahlil topshirish jarayonini qayta ko‘rib chiqish, aholi uchun qulay tizimni ishlab chiqish topshirig‘i berildi. Prezident kasallik tarqalmagan hududlarda karantinni yumshatish, qishloq xo‘jaligi xodimlarining bemalol ishlashi, mahsulotini xaridorlarga yetkazib berishi uchun barcha sharoitni yaratish kerakligini aytdi.

Eslatib o‘tamiz, Shavkat Mirziyoyev 8-iyul kuni bo‘lib o‘tgan yig‘ilishda koronavirus juda murakkab sinov va og‘ir kurash bo‘lishini ta’kidlagandi hamda joylarda belgilangan qoidalarga amal qilish borasida sustkashlikka yo‘l qo‘yilganini bildirgandi.