Shaxsiy avtomobilda harakatlanish kunning ma’lum vaqtlarida chegaralanganidan so‘ng yo‘nalishsiz taksilarga bo‘lgan ehtiyoj o‘z-o‘zidan oshgan. Aholi orasida esa taksilarning narxlari bu vaqtda keskin oshgani tanqid qilinmoqda. Shu munosabat bilan Toshkent shahar transport boshqarmasi tomonidan reydlar uyushtirildi, deya xabar beradi shahar hokimligi.
Qayd etilishicha, reydlar shaharda o‘rnatilgan 24 ta blokpostlarda tashkil qilinib, Transport vazirligi hamda Toshkent shahar transport boshqarmasi inspektorlari tomonidan olib borilgan.
Boshqarma inspektori Muzaffar Oripovning ta’kidlashicha, tadbir boshidan beri 376 ta qonunbuzarlik holatlari aniqlangan. Jumladan, narxlarni asossiz oshirilganligi va litsenziya talab va shartlarini buzilganlik to‘g‘risidagi dalolatnomalar rasmiylashtirilgan. Shu kunga qadar 64 ta korxonalariga tegishli tartibda talabnomalar yuborilgan va litsenziyalari bekor qilingan.
Hududlarda tashkil etilgan vaqtinchalik blokpostlarda o‘tkazilgan tekshiruvi davomida ko‘p hollarda, asosan, “Yandeks Taksi” dasturi orqali ishlovchi yo‘nalishsiz taksilarda narxlarning oshirilishi bo‘yicha shikoyatlar tushgan.
Izoh (0)