Toshkent shahrida 2021-yildan boshlab elektromobillarni quvvatlash stansiyalarini qurish rejalashtirilmoqda. Bu Prezidentning 10-iyuldagi “Iqtisodiyotning energiya samaradorligini oshirish va mavjud resurslarni jalb etish orqali iqtisodiyot tarmoqlarining yoqilg‘i-energetika mahsulotlariga qaramligini kamaytirishga doir qo‘shimcha chora-tadbirlar to‘g‘risida”gi qarorida belgilangan.
Mazkur qarorda uni amalga oshirish bo‘yicha “yo‘l xaritasi” va bir qator aniq chora-tadbirlar belgilangan. Jumladan, qarorda elektromobillar uchun infratuzilmani yaratish ko‘zda tutilgan. Qarorga ko‘ra, 2020-yilning sentabr oyida xorijiy tajribani o‘rganish asosida tahliliy materiallar tayyorlanadi.
Shundan so‘ng stansiyalarni qurish uchun joylar o‘rganiladi, 2021-yilning yanvar oyida esa Toshkent shahrida Xalqaro elektrotexnika komissiyasining 61851−1-Mode 4 standartiga mos keladigan dastlabki ikkita elektromobillarni quvvatlash stansiyasini o‘rnatish rejalashtirilmoqda. Stansiyalarni qurish ishlari “O‘zbekneftegaz” kompaniyasi mablag‘lari hisobidan amalga oshirilishi kutilmoqda.
Avvalroq Toshkentlik tadbirkor poytaxt taksi xizmati uchun Xitoydan 500 ta elektromobil sotib olgani haqida xabar berilgandi.
Shuningdek, 2019-yilning sentabridan boshlab Belarusning Vitovt Electro E420 elektrobusi Toshkent ko‘chalari bo‘ylab qatnay boshlagandi. Mazkur transport vositasi 450 ming dollarga xarid qilingan edi. Shu yilning mart oyida esa Xitoyning Yutong elektrobusi poytaxtda harakatlana boshlagani ma’lum bo‘lgandi.
Ma’lumot uchun, O‘zbekistonda elektromobillar ishlab chiqarishni yo‘lga qo‘yish borasida harakatlar allaqachon boshlangan. Qo‘qonda 2023-yildan boshlab elektromobil ishlab chiqarilishi rejasi borasida avval xabar berilgan edi. Xonobodda (Andijon viloyati) ham elektromobil ishlab chiqarilishi yo‘lga qo‘yilishi haqida xabarlar mavjud. Innovatsion rivojlanish vazirligi esa Qozog‘iston bilan hamkorlikda elektromobil ishlab chiqarish rejalarini muhokama qilgandi.
Izoh (0)