Sog‘liqni saqlash vazirligi Toshkent shahrining Yunusobod tumanida yashovchi, koronavirusga chalingan 39 yoshli M.R. ismli erkak vafot etganini xabar qildi.
Xabarga ko‘ra, Yunusobod tumanida yashagan 39 yoshli M.R.da 6-iyul kuni COVID-19 tasdiqlangan va u Virusologiya ilmiy tekshirish instituti klinikasiga yotqizilgan.
Bemorga COVID-19 koronavirus infeksiyasining o‘ta og‘ir kechishi, ikki tomonlama pnevmoniya tashxisi qo‘yilgan. Kasallik o‘tkir miokard infarkti, o‘tkir nafas va yurak-qon tomir yetishmovchiligi, poliorgan yetishmovchiligi asoratlari bilan kechgan.
Shifoxonada bemorning davolanishi davomida tibbiyot mutaxassislari tomonidan onlayn konsultatsiya va konsiliumlar qilingan, davolash jarayoni mutaxassislar tavsiyasi asosida olib borilgan.
Biroq shifokorlar tomonidan standartlar asosida o‘tkazilgan reanimatsion muolajalarga qaramay, M.R. o‘tkir nafas va yurak-qon tomir yetishmovchiligidan vafot etgan, deyiladi xabarda.
Bu SSV statistikasi bo‘yicha 87, “Daryo” hisob-kitobiga ko‘ra esa O‘zbekistondagi 90-o‘lim holati.
“Daryo” 15-iyul kuni Davlat xizmatlari agentligiga tayanib, agentlikning Navoiy viloyati boshqarmasining mas’ul xodimi Adhamjon Dehqonovning koronavirus oqibatida vafot etganini xabar qilgan. Shuningdek, 18-iyul kuni koronavirusga chalingan Madaniyat vazirligi xodimi, 32 yoshli Akmal Irisov vafot etgani ma’lum bo‘ldi.
19-iyulda Olmazor tumani “Mirzo G‘olib” mahallasida joylashgan 18-oilaviy poliklinika katta hamshirasi Feruza To‘xtayeva koronavirus infeksiyasi asoratlari oqibatida vafot etgan va tuman hokimligi bu haqda xabar bergan. Ushbu o‘lim holatlari hozircha SSV tomonidan tasdiqlanmagan.
Izoh (0)