Соғлиқни сақлаш вазирлиги Тошкент шаҳрининг Юнусобод туманида яшовчи, коронавирусга чалинган 39 ёшли М.Р. исмли эркак вафот этганини хабар қилди.
Хабарга кўра, Юнусобод туманида яшаган 39 ёшли М.Р.да 6 июль куни COVID-19 тасдиқланган ва у Вирусология илмий текшириш институти клиникасига ётқизилган.
Беморга COVID-19 коронавирус инфекциясининг ўта оғир кечиши, икки томонлама пневмония ташхиси қўйилган. Касаллик ўткир миокард инфаркти, ўткир нафас ва юрак-қон томир етишмовчилиги, полиорган етишмовчилиги асоратлари билан кечган.
Шифохонада беморнинг даволаниши давомида тиббиёт мутахассислари томонидан онлайн консультация ва консилиумлар қилинган, даволаш жараёни мутахассислар тавсияси асосида олиб борилган.
Бироқ шифокорлар томонидан стандартлар асосида ўтказилган реанимацион муолажаларга қарамай, М.Р. ўткир нафас ва юрак-қон томир етишмовчилигидан вафот этган, дейилади хабарда.
Бу ССВ статистикаси бўйича 87, «Дарё» ҳисоб-китобига кўра эса Ўзбекистондаги 90-ўлим ҳолати.
«Дарё» 15 июль куни Давлат хизматлари агентлигига таяниб, агентликнинг Навоий вилояти бошқармасининг масъул ходими Адҳамжон Деҳқоновнинг коронавирус оқибатида вафот этганини хабар қилган. Шунингдек, 18 июль куни коронавирусга чалинган Маданият вазирлиги ходими, 32 ёшли Акмал Ирисов вафот этгани маълум бўлди.
19 июлда Олмазор тумани «Мирзо Ғолиб» маҳалласида жойлашган 18-оилавий поликлиника катта ҳамшираси Феруза Тўхтаева коронавирус инфекцияси асоратлари оқибатида вафот этган ва туман ҳокимлиги бу ҳақда хабар берган. Ушбу ўлим ҳолатлари ҳозирча ССВ томонидан тасдиқланмаган.
Изоҳ (0)