Toshkent shahrida koronavirus bilan kasallangan 65 yoshli erkak vafot etdi. Bu haqda Sog‘liqni saqlash vazirligi xabar bergan.
Xabarda qayd etilishicha, Olmazor tumanida yashagan 65 yoshli K.G. ismli erkakda 11-iyul kuni COVID-19 tasdiqlangan va u Toshkent tibbiyot akademiyasining ko‘p tarmoqli klinikasiga yotqizilgan.
Bemor doimiy ravishda yurak ishemik kasalligi, gipertoniya kasalligi, qandli diabet, surunkali o‘pka obstruktiv kasalligi bilan davolanib yurgan.
Bemorga mutaxassislar tomonidan onlayn konsultatsiya va konsiliumlar o‘tkazilgan, davolash jarayoni belgilangan standartlar asosida olib borilgan.
Hamroh kasalliklar fonida kasallik asoratlari hisobiga ahvoli keskin og‘irlashgan bemor mutaxassislar tomonidan to‘liq hajmda, standart asosida o‘tkazilgan reanimatsion choralarga qaramasdan, o‘tkir nafas va yurak-qon tomir yetishmovchiligidan vafot etgan, deyiladi SSV xabarida.
Bu vazirlik taqdim etib kelayotgan statistika bo‘yicha 86, “Daryo” yuritayotgan O‘zbekistonda davlat hokimiyati va boshqaruvi organlari tomonidan ma’lum qilingan koronavirus oqibatida yuz bergani tasdiqlangan 89-o‘lim holatdir. Avval Toshkentning Olmazor tumani “Mirzo G‘olib” mahallasida joylashgan 18-oilaviy poliklinika katta hamshirasi Feruza To‘xtayeva koronavirus infeksiyasi asoratlari oqibatida vafot etgani xabar qilingandi.
Izoh (0)