Toshkent shahar tez tibbiy yordam stansiyasi shifokori Nuriddin Zohidov faoliyati bilan bog‘liq asosiy muammolar haqida fikr bildirdi. U bu haqda 18-iyul kuni “O‘zbekiston 24” telekanalining “COVID-19. Vaziyat” dasturiga jonli efirda bergan intervyusida aytib o‘tgan.
“Tez yordam xizmatiga 100 ta qo‘shimcha mashina beradimi, 300 ta beradimi, 400 ta beradimi, farqi yo‘q, agar asossiz chaqiruvlar bo‘lmasa, hozirda mavjud mashinalarning o‘zi ham yetarli. Asossiz chaqiruvlar bo‘lmasa, yetarli. Dori-darmon ham yetarli. Agar asossiz chaqiruvlar bo‘lmasa, bizda hamma narsa yetarli.
Endi, tana harorati 37 darajaga ko‘tarilsa ham menga ukol qilib qo‘ygin deydi, qon bosimi 10-20 ko‘rsatkichga o‘zgarsa ham ukol qilib qo‘ygin deydi, lekin kechirib qo‘yasiz, ularga buning keragi yo‘q. Asosiy resurs mana shunaqa asossiz chaqiruvlarga ketib qoladi: Tez yordamning, mashinaning, doktorlarning vaqti ketadi, dorilar ketib qoladi.
Tez tibbiy yordam xizmatida bunday asossiz chaqiruv holatlari doimo bo‘ladi. Lekin chaqiruv bo‘lganidan keyin, buni hech kim yo‘q qila olmaydi, biz borishimiz kerak. Kech qolish holatlari kamdan kam bo‘ladi, yo‘lda biror holat bo‘lsa, tig‘iz vaqtlarda tirbandlikka tushib qolsak sal kechroq borishimiz mumkin.
Yo‘llarda haydovchilar tez yordam mashinalariga yo‘l berishyapti — oxirgi bir yilda bu borada yaxshi tomonga o‘zgarish juda katta. Lekin mashinalar ham juda ko‘payib ketgan, ko‘p joylarda yo‘llar ta’mirlanyapti. Hozir postlar qo‘yilyapti, u yerlardan birpasda o‘tkazib yuborishyapti, lekin o‘sha asossiz chaqiruvlar bo‘lmasa, tez yordam mashinalari vaqtida yetib boradi”, – degan Nuriddin Zohidov.
Avval Nuriddin Zohidovning Toshkent shahrida so‘nggi kunlarda tez tibbiy yordam xizmatiga tana haroratining ko‘tarilishi bilan bog‘liq chaqiruvlar keskin ko‘payganini bildirgani, COVID-19 kasalligi “ko‘pchilik odamlarda shamollashdek o‘tib ketishi”ni aytgani xabar qilingan.
Shuningdek, internetda Toshkentda tez yordam xodimlari xonadonga borib, bitta “zayavka”ga faqat bir nafar bemorni tekshirayotgani haqida video tarqalgan, keyinchalik koronavirusga qarshi kurash shtabi a’zosi Feruza Hamroboyeva AOKA huzuridagi shtabda tashkil etilgan brifingda ushbu holatga izoh berib, Tez yordam o‘z nomi bilan tez yordam ekani, bitta odamga kelgan ‘zayavka’ bo‘yicha mana shu brigadaga vaqt ajratilishi, tez yordam vakillari bitta chaqiruv bo‘yicha faqat bitta bemorni ko‘rish vakolatiga egaligini bildirgandi.
Izoh (0)