Amerikalik reper Kanye Uestning yuzi Rashmor tog‘idagi AQSh prezidentlari qatorida paydo bo‘ldi. Bunda unga qo‘shiqchining siyosiy karyerasi emas, balki fototahrirlagich yordam bergan, deb yozadi Esquire.
Rashmor tog‘ida Jorj Vashington, Tomas Jefferson, Teodor Ruzvelt va Avraam Linkoln portretlarining barelyefi o‘rin olgan. Aftidan reper siyosiy kurashga jiddiy kirishgan ko‘rinadi.
Eslatib o‘tamiz, taxminan ikki hafta oldin reper 2020-yilning noyabrida AQSh prezidentligi uchun bo‘lib o‘tadigan saylovlarda ishtirok etmoqchiligini ma’lum qilgandi.
Ushbu bayonotdan so‘ng, reper Forbes jurnaliga bergan intervyusida Oq uyning ishlash modelini Vakanda prinsipaga (Marvel olamidagi to‘qima mamlakat) asosan qayta yaratishini ma’lum qilgan. Shuningdek, reper vaksinatsiyaga shubha bilan qarashini bildirgan. Koronavirusga qarshi vaksinani u insonlar jannatga tushmasligi uchun chiplashtirish jarayoni deb hisoblaydi.
Oradan o‘n kun o‘tgach, OAVda Kanye Uest prezidentlik poygasidan chiqishi haqida xabarlar paydo bo‘lgandi, biroq ertasi kuni u prezidentlikka nomzod sifatida rasman ro‘yxatdan o‘tgan.
Ma’lumot uchun, 2020-yil aprel oyida reper Kanye Uest moliyaviy hisobotlarini e’lon qilgandan so‘ng milliarderga aylangandi. Iyun oyida Forbes eng ko‘p haq to‘lanadigan mashhurlar reytingini e’lon qilgan, unda Uest Kayli Jennerdan keyin 170 million dollar bilan 2-o‘rinni egallagandi.
Izoh (0)